ޢީދު ބައިބަލާ ޗެލެންޖު 1446 ހުޅުމާލޭ ސެންޓްރަލް ޕާކުގައި ރޭ ހުޅުމާލޭގައި ފަށައިފިއެވެ. ފިޠުރު ޢީދާ ދިމާކޮށް ބާއްވަމުން އަންނަ މި މުބާރާތުގައި މިފަހަރު 29 ޓީމަކުން ވަނީ ބައިވެރިވެފައެވެ. 

ނޮކްއައުޓް އުސޫލުން ކުރިޔަށްގެންދާ މި މުބާރާތުގައި ރޭ ވަނީ 6 މެޗެއް ކުޅެފައެވެ. އެގޮތުން ފުރަތަމަ މެޗުގައި ބައްދަލުކުރީ، މުބާރާތުގެ އެންމެ ފަހުގެ ޗެމްޕިއަން ބުރު ސްޕޯޓްސް ކްލަބާއި ކްލަބް ޓީއެފްޓީއެވެ. މި މެޗު ކާމިޔާބުކޮށް ޓީއެފްޓީ ވަނީ ފަހުގެ ޗެމްޕިއަނުން ކަޓުވާލާފައެވެ. 

ދެވަނަ މެޗުގައި ޓީއެފްޓީ ވަކަރުގެއިން ވަނީ ދަ ބައުސްގެ މައްޗަށް ކުރިހޯދާފައެވެ. އަދި ތިން ބަނަ މެޗުގައި މުބާރާތުގެ އެންމެ ފަހުގެ ރަނާސްއަޕް، ކްލަބް ކާސިންޖީން ކްލަބް އޯވަންއޯ ބަލިކުރިއިއިރު، ހަތަރު ވަނަ މެޗުގައި ޖަނަވަރީމަގު ސްޕޯޓްސްއިން ވަނީ ގަދަހިފުމަކުން ލިޓްލް ޓައުން ބަލިކޮށްފައެވެ. 

ރޭ ކުޅުނު ފަސްވަނަ މެޗާއި ހަވަނަ މެޗު ކާމިޔާބުކުރީ ބީޖީ ނިއު ޖެނެރޭޝަން އާއި އެލްޓީ ސްޕޯޓްސްއެވެ. ބިޖީ ނިއުޖެނެރޭޝަނުން ގަދަ ހިފުމަކަށްފަހު ކުޑަ ހެންވޭރު ޔުނައިޓެޑު ބަލިކުރިއިރު، އެލްޓީ ސްޕޯޓްސް ކުރި ހޯދީ ކާސިންޖާއާ ދެކޮޅަށެވެ. 

އެހެންކަމުން ރޭގެ މެޗުތަކަށްފަހު 6 ޓީމެއް މިވަނީ ގަދަ-16 އިން ޖާގަހޯދާފައެވެ. އެއީ ކްލަބް ޓީއެފްޓީ އާއި ޓީއެފްޓީ ވަކަރުގެ އާއި ކްލަބް ކާސިންޖީ އާއި ޖަނަވަރީމަގު ސްޕޯޓްސް އާއި ބީޖީ ނިއު ޖެނެރޭޝަން އަދި އެލްޓީ ސްޕޯޓްސްއެވެ.