ޑިމޮކްރަސީގެ މަގުން ރާއްޖޭގެ ވެރިކަމުގެ ނިޒާމު ބައްޓަންވެ ހިންގަން ފެށިފަހުން މިހާތަނަށް ރައީސުލްޖުމްހޫރިއްޔާ އިންތިހާބުކުރުމަށް 3 އިންތިހާބެއް ބާއްވައިފިއެވެ. އެއިން ކޮންމެ އިންތިހާބެއްގައިވެސް ބޮޑެތި މައްސަލަތަކެއް އިންތިހާބުގެ ކޮންމެ ބުރެއްގައިވެސް ކުރިމަތިވެއެވެ. ވޯޓާއި މެދު ރައްޔިތުން ޝައްކު ކުރުމާއި، ދެފުށް ފެންނަ އިންތިހާބެއްކަމާއި މެދު އުފެދޭ ސުވާލުތަކެވެ. އަހަރުން އަހަރަށް ރާއްޖޭގައި އެކި ފެންވަރުގައި ބޭއްވޭ އިންތިހާބުތަކުގައި ރާއްޖޭގެ އިލެކްޝަން ކޮމިޝަނުން ގެންދެވީ އިންތިހާބުތައް އަމާންކަމާއެކު ގެންދެވޭނެ ކަންކަން ތަންފީޒުކުރުމުގެ މަސައްކަތް ކުރަމުންނެވެ. މިގޮތުން މިވީ 15 އަހަރުގެ ތެރޭގައި ގިނަ ކަންކަމެއް އިލެކްޝަނުންވަނީ އިސްލާހުކޮށްފައެވެ. ނަތީޖާއެއްގޮތުން ރާއްޖޭގައި މިހާތަނަށް ބޭއްވި އެންމެ ބޮޑު އިންތިހާބުން ބޮޑެތި ކުރިއެރުންތަކެއްވަނީ ފެނިގެންގޮސްފައެވެ. މިމަހުގެ 9 ވަނަ ދުވަހު ބޭއްވި އިންތިހާބު އޮބްޒާވްކޮށް މޮނީޓާ ކުރުމަށްޓަކައި ރާއްޖެއިން ބޭރުގެ 140 އަށްވުރެގިނަ މީހުންވަނީ ހަރަކާތްތެރިވެފައެވެ.

އިންތިހާބަށްފަހު އެ ހުރިހާ މީހުން ފާހަގަކުރި އެއްކަމެއް އޮތެވެ. އެއީ މިފަހަރުގެ އިންތިހާބު ދިޔަ އަމާންކަމާއި އޮމާންކަމެވެ. އިންތިހާބުގެ ކަންކަން ބެލުމަށް އައި އީޔޫގެ ޓީމުގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެ މިޝަނުން ބުނީ އިންތިހާބުގެ ކުރިން އެކި ޕާޓީތަކުން ފޯރިގަދަކޮށް ކެމްޕެއިންކުރިއިރުވެސް ބޮޑެތި މައްސަލަތަކެއް ކުރިމަތިނުވާކަން ފާހަގަވާކަމަށެވެ. އަދި ރާއްޖޭގެ އިލެކްޝަން ކޮމިޝަނުގައި މުވައްޒަފުންގެ ދަތިކަން ހުރިނަމަވެސް އިންތިހާބުގެ ތެރޭގައި އެކަމެއް ފާހަގަނުކުރެވޭކަމަށެވެ. އަދި އިލެކްޝަނުން އިންތިހާބުގެ ކަންކަން އިންތިޒާމުކޮށްފައިވަނީ ވަރަށް ފުރިހަމައަށްކަން އެޓީމުން ފާހަގަކުރިއެވެ.

ރާއްޖޭގައި ހަރަކާތްތެރިވި އީޔޫ ޓީމުން ބުނީ ރާއްޖޭގައި ބޭއްވި އިންތިހާބުގައި އާއްމު ރައްޔިތުންގެ ފަރާތުން ފެނިގެންދިޔައީ ވަރަށް ހިތްގައިމު މަންޒަރެއްކަމަށެވެ. އެގޮތުން ހެނދުނު 06:30 ހުންފެށިގެން އެތައް ބަޔަކު ކިޔުތައް ހަދާފައިވާކަމަށާއި، ހަވީރު 4 ޖެހުމާއި ހަމައަށް ދިޔައިރުވެސް ކިޔުތަކުގައި އެތައް ބަޔަކު ތިބިކަމަށެވެ. އަދި އެއިން އެއްވެސް އިރެއްގައި ކިޔުގައި މަޑުކުރަންޖެހިގެން ހަމަނުޖެހުމެއް ހިނގާފައިނުވާއިރު ރައްޔިތުންގެ ފަރާތުން ފެނިގެންދިޔައީ ކެތްތެރިކަންކަމުގައި އީޔޫ ޓީމުން ފާހަގަކުރިއެވެ. އަދި ހަމައެއާއެކު އިންސާފުވެރި މިނިވަން އަދި ދެފުއްފެންނަ އިންތިހާބެއް ބޭއްވިގެންދިޔަކަންވެސް އެޓީމުން ފާހަގަކުރިއެވެ.

Advertisement

ކޮންމެއަކަސް އިންތިހަބުގެ ފުރަތަމަ ބުރު ނިމިއްޖެއެވެ. ނިމިގެންދިޔައިރު އިލެކްޝަނަށް ހުށައަޅާފައިވަނީ 51 މައްސަލައެކެވެ. އޭގެތެރޭގައި ކެމްޕޭންކުރުމާއި ގުޅޭ 3 މައްސަލައެއް ހިމެނެއެވެ. އަދި ވޯޓުލުމުގެ ހައްގާއި ގުޅޭ 10 މައްސަލައެއް ހުށައަޅާފައިވެއެވެ. އަދި ރަޖިސްޓްރޭޝަނާއި ގުޅޭ 8 މައްސަލައަކާއި އޮފިޝަލުންނާއި ގުޅޭ 11 މައްސަލައަކާއި ވޯޓުގެ ސިއްރުކުރުމާއި ގުޅޭ 14 މައްސަލައެއް ހުށައަޅާފައިވާކަމަށް އީސީއިން ބުނެއެވެ. އަދި ވަގުތުން ހައްލުކުރެވޭ ހުރިހާކަމެއް ވަގުތުން ހައްލުކޮށްފައިވާއިރު އެހެނިހެން މައްސަލަތައް ކަމާއި ގުޅޭ އިދާރާތަކައި ގުޅިގެންދަނީ ބަލަމުންނެވެ.

ޖުމްލަގޮތެއްގައި އިންތިހާބުގެ ފުރަތަމަ ބުރު މިފަހަރު ނިމިގެންދިޔައީ ވަރަށްވެސް އަމާންކަމާއި އޮމާންކަމާއެކީގައެވެ. ނަތީޖާއަކީ ސަރުކާރަށް އޮންނަ ތަފާތު ތުހުމަތުތައް މިއިންތިހާބުގައި ނެތުމެވެ. ރާއްޖޭގެ ހުރިހާ ސަރަހައްދެއްގައިވެސް ވޯޓުލުން ގަޑިއަށް ފެށިފައިވާއިރު، ވޯޓުލުން ވަގުތީގޮތުން ހުއްޓާލި 2 ސަރަހައްދުގައިވެސް މައްސަލަ ހައްލުކޮށް، ކުޑަވަގުތުކޮޅެއްގެ ތެރޭގައި ވޯޓުލާން ވަނީ ފަށާފައެވެ. އެހެންކަމުން މިއީ ތާރީހުގައި ލިޔެވޭނެ ފަދަ ރަނގަޅު އިންތިހާބީ މަންޒަރެކެވެ.