މި ސެޕްޓެމްބަރ 30 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ދެވަނަ ބުރުގައި ވޯޓުލުމަށް އެންމެ ރަގަޅު ކެނޑިޑޭޓަކީ ކޮބައިތޯ ބެލުމަށް އެކި މީހުން މިނެ ކިރަނީ އެކި ގޮތްގޮތަށެވެ. އިސްލާމްދީނުގައި މިފަދަ ދަނޑިވަޅުތަކުގައި، ކަންތައްކުރާނެ ގޮތުގެ ޙައްލެއްގެ ގޮތުން އިސްތިޚާރާ ނަމާދު ޝަރުޢުކުރައްވާފައިވެއެވެ. މިއީ ކުރިމަތީގައި އޮތް ދެގޮތުންކުރެ ބޮޑަށް ރަނގަޅުގޮތެއް ދެއްކެވުން އެދި ކުރާ ނަމާދެކެވެ.

ކުރިޔަށް މިއޮތް އިންތިހާބުގައި ވޯޓުލާނެ ކެނޑިޑޭޓެއް ނިންމުމުގެ ކުރިން އައްޝައިޙް އިލްޔާސް ޖަމާލު ހިޔާރުކުރެއްވީ މިގޮތަށް ޢަމަލު ކުރުމަށެވެ. އެގޮތުން ފާއިތުވި ފަސް ދުވަހު އިސްތިޚާރާ ނަމާދުކޮށް ދުޢާ ކުރުމުން ވެސް ޝެއިޙް އިލްޔާސްގެ ހިތް ބުނީ އެއް ވާހަކައެއް ކަމަށާއި، އެއީ މިޤައުމު މިއޮތް ޙާލަތާއި ސިޔާސީ މަސްރަޙަށް ބަލާއިރު އަދިވެސް އެންމެ ރަނގަޅު ޗޮއިސްއަކީ ހަމަ އޯގާތެރި، ޙިކުމަތްތެރި، ކެތްތެރި އަދި ޙިލްމުވެރި ރައީސް އިބްރާޙިމް މުޙައްމަދު ޞާލިޙްއަށް ވޯޓު ދިނުން ކަމަށެވެ. ޝެއިހް އިލްޔާސް މިކަން ހާމަކުރެއްވީ މިއަދު ކުރެއްވެވި ޓްވީޓެއްގައެވެ.

މީގެ ކުރިންވެސް ނޫން އަށް ދެއްވި ޙާއްޞަ އިންޓަވިއުއެއްގައި ވާހަކަ ދައްކަވަމުން ވެރިކަމަށް ދަހިވެތިވެގެން ވެރިކަމަށް އަންނަން ބޭނުން މީހުންނާއި އަދި ގިނަ ބަޔަކަށް ފެނިގެން ވެރިކަމަށް ގެންނަ މީހާގެ ތަފާތު އައްޝައިޙް އިލްޔާސް ޖަމާލް އޮޅުންފިލުވައި ދެއްވާފައިވެއެވެ.

އެގޮތުން، ވެރިކަމަށް ދަހިވެތިވެގެން އަންނަ މީހާއަށް ވެރިކަން ދިނުމަކީ ދީނީ ގޮތުން ބަލާއިރު ރަގަޅުކަމެއް ނޫންކަމަށާއި، އެބޭފުޅާ ނޫން، އެ ކަމަށް ޤާބިލް އެހެން ބޭފުޅަކު ހުންނެވިނަމަ އެ ބޭފުޅަކު ވެރިކަމަށް ގެނައުން މާ އަޢުލާކަން ބޮޑުކަން ޝެއިޙް ފާހަގަކުރައްވާފައިވެއެވެ. މީގެ އިތުރުން އިސްލާމީ ވެރިކަމެއްގައި އެންމެ މުހިންމު އެއްސިފައަކީ މަޝްވަރާގެ މަތިން އެ ވެރިކަމެއް ކުރުން ކަމަށާއި، އެ މާތް ސިފަފުޅު ވެސް، ރައީސުލްޖުމްޙުރިއްޔާ އިބްރާޙިމް މުޙައްމަދު ސާލިޙްގެ ފުށުން ފެންނަކަމަށް ދީނީ ޢިލްމުވެރިޔާ އައްޝައިޙް އިލްޔާސް ޖަމާލް ވިދާޅުވެފައިވެއެވެ.