ލޯފަން މީހުންނަށް ވޯޓުލުމަށް ހާއްސަކޮށްފައިވާ ޓެންޕްލޭޓް ބޭނުންކޮށްގެން ރިޔާސީ އިންތިހާބުގެ ފުރަތަމަ ބުރުގައި 45 މީހަކު ވޯޓުލާފައިވާ ކަމަށް އިލެކްޝަންސް ކޮމިޝަންއިން ބުނެފި އެވެ.

ލޮލަށް ފެނުމުގައި ނުކުޅެދުންތެރިކަން ހުންނަ މީހުންނަށް، މީގެ ކުރިން ބޭއްވި އިންތިހާބުތަކުގައި ވޯޓުލާން ޖެހެނީ އެހެން މީހެއްގެ އެހީތެރިކަމާ އެކު އެވެ. އެހެން ނަމަވެސް މިއަހަރު ގާނޫނަށް ގެނެވުނު އިސްލާހާ އެކު ޕްލާސްޓިކް ޓެމްޕްލޭޓެއް ބޭނުންކޮށްގެން އެ ފަރާތްތަކަށް އަމިއްލައަށް ވޯޓުލެވޭ ގޮތް ވަނީ ހަމަޖައްސާފަ އެވެ. މިއީ އެ ފަރާތްތަކަށް ލިބިގެންދިޔަ ބަޔާންކުރަން ނޭންގޭފަދަ ބޮޑު އުފަލެއްގެ ގޮތުގައި ލޯފަން މީހުން ވަނީ ބުނެފައެވެ. އަދި މިކަމަށްޓަކައި އެ ފަރާތްތަކުން ވަނީ މި ސަރުކާރަށް ނިހާޔަތައް ޝުކުރު ދަންނަވާފައެވެ.

ލޯފަން މީހުންގެ ޖަމިއްޔާއިން ދިޔައީ ލޯފަން މީހުންނަށް އަމިއްލައަށް ވޯޓް ލުމުގެ ހައްގު ހޯދައިދިނުމަށް 2017 ވަނަ އަހަރުން ފެށިގެން މަސައްކަތް ކުރަމުން ނެވެ.  ނަމަވެސް އެކަން މި ފަހިވެގެންދިޔައީ ރައީސް އިބްރާހިމް މުހައްމަދު ސާލިހްގެ ސަރުކާރުގައެވެ.

އެކި ކަހަލަ ނުކުޅެދުންތެރިކަން ހުންނަ ފަރާތްތަކަށް ފަސޭހަކަމާ އެކު މި އިންތިހާބުގައި ވޯޓު ލެވޭ އިންތިޒާމް ހަމަޖައްސާފައި ވާތީ ބައިނަލްއަގްވާމީ އޮބްޒާވަރުން ވެސް ވަނީ އީސީއަށް ތައުރީފްކޮށްފަ އެވެ.