މި ސެޕްޓެމްބަރ މަހުގެ 30 ވަނަ ދުވަހު ރިޔާސީ އިންތިހާބުގެ ދެވަނަ ބުރު ބޭއްވުމަށް ނިންމާފައިވާއިރު، މި ބުރުގައި ކާމިޔާބު ކަށަވަރު ކުރުމަށް ކޮންމެ ކެނޑިޑޭޓަކަށް ވެސް އިތުރު ޕާޓީއަކާއި ނުވަތަ ކެނޑިޑޭޓަކާއި ގުޅުން މުހިންމު ވާނެއެވެ. މިކަމުގައި ފުން ވިސްނުންތަކެއް ވިސްނަންޖެހޭ އެއް ޕާޓީއަކީ ޖުމްހޫރީ ޕާޓީކަމަށް ސިޔާސީ މާހިރުން ދެކެއެވެ. ސަބަބަކީ ވެރިކަން ބަދަލުވެއްޖެނަމަ, އިދިކޮޅު ސިޔާސީ ލީޑަރުންގެ އިތުރުން, އެ ބޭފުޅުންނާއި ގުޅުންހުރި ވިޔަފާރިތައް ވެސް މީގެ ކުރިން އުނދަގޫ ދުވަސްތަކާއި ކުރިމަތިލާން ޖެހިފައި އޮތުމެވެ. 

2013 ވަނަ އަހަރު ރައީސް އަބްދުﷲ ޔާމިން އަބްދުލް ޤައްޔޫމް ވެރިކަމަށް ވަޑައިގެންނެވީ ދެވަނަ ބުރުގައި ޖުމްހޫރީ ޕާޓީއާ އެކު ކޯލިޝަން ހައްދަވައިގެންނެވެ. ނަމަވެސް އެ ކޯލިޝަން ރޫޅި, ރައީސް ޔާމިންގެ ވެރިކަމުގައި އެންމެ ބޮޑު އަނިޔާއެއް ލިބިލެއްވި އެއް ބޭފުޅަކީ ޖުމްހޫރީ ޕާޓީގެ ލީޑަރު ޤާސިމް އިބްރާޙިމްއެވެ. މީގެ އިތުރުން، އެ މުއްދަތުގައި ސަރުކާރުން ވަނީ އެބޭފުޅާގެ ވިޔަފާރިތަކަށް ވެސް ދަތި ކޮށްފައެވެ. 

އެގޮތުން ޓުއަރިޒަމް ވިޔަފާރިއަށް ބޭނުންވާ ބައެއް ތަކެތި ވިލާ ގްރޫޕުގެ ރިޒޯޓުތަކަށް އެތެރެކުރުން މަނާކޮށް، ރިޒޯޓު އޮޕަރޭޝަންއަށް އުނދަގޫ ކުރުމާއި، ވިލާއާ ގުޅޭ މައްސަލަތައް ކޯޓުތަކުން ބަލަމުން އަންނަނިކޮށް، ދައުލަތުގެ މުއައްސަސާތައް ބޭނުންކޮށްގެން ސަރުކާރުން ވިލާގެ އެކައުންޓުތައް ފްރީޒްކޮށް، ކަސްޓަމްސްއިން މުދާ ދޫކުރުން ހުއްޓާލައި އިމިގްރޭޝަނުން ދޭން ޖެހޭ ޚިދުމަތްތައް ހުއްޓާލުމުން ވަރަށް ދަތި އުނދަގޫ ހާލަތެއް ކުރިމަތި ވެފައިވާ ކަމަށް ގާސިމް އޭރު ވިދާޅުވެފައިވެއެވެ.

މިކަމާއި ގުޅިގެން ޤާސިމް އިތުރަށް ވިދާޅުވެފައިވަނީ ވިލާ ގްރޫޕްގެ ވިޔަފާރިތަކާ ދެކޮޅަށް ރައީސް ޔާމިންގެ ސަރުކާރުން ހިންގަވަނީ ހައްގު ނޫން އަމަލުތަކެއް ކަމަށާއި، ސަރުކާރުން އުޅުނީ އެބޭފުޅާ ބަނގުރޫޓު ކޮށްލުމަށް ކަމަށެވެ. މީގެ އިތުރުން ވިލާގެ ވިޔަފާރިތަކަށް ސަރުކާރުން ދަތިކުރަނީ ރާއްޖެ އާއި ދިވެހިންގެ ކުރިއެރުމާއި ހެވާއި ލާބައަށްޓަކައި އެބޭފުޅާ ކުރައްވާ މަސައްކަތްތައް ހުއްޓުވައިލުމަށް ކަމަށެވެ.

ސަރުކާރުން މި ކަންކަން ކުރީ ވިލާ ކުންފުނިން ޓެކްސް ނުދައްކާތީ ކަމަށް ބުނެ ނަމަޔަސް، ޤާސިމް އޭރު ފާހަގަ ކުރެއްވީ ވިލާގެ ކުންފުނިތަކުން ދައުލަތަށް ދައްކަން ޖެހޭ ޓެކްސްތައް ދައްކަމުން ދިޔަ ކަމަށެވެ. އަދި ސަރުކާރާއި ވިލާގެ ކުންފުނިތަކާ ދެމެދު ވެވުނު އެއްބަސްވުންތައް ހުރި ކަމަށާއި އެ އެއްބަސްވުންތަކާ ޚިލާފުވީ ސަރުކާރުން ކަމަށް ވެސް ގާސިމް ވިދާޅުވި އެވެ.

ކޮންމެއަކަސް މި ދަތިކުރުންތަކާއި ގުޅިގެން ރިޒޯޓުތަކުގެ ހިންގުމަށް ބުރޫއެރިއެވެ. އަދި މިކަމާއި ގުޅިގެން މުވައްޒިފުން ބުނަމުންދިޔައީ އެމީހުންނަކީވެސް ދިވެހި ރައްޔިތުން ކަމަށާއި އެމީހުން އަނބިދަރިން ދޫކޮށް ރިޒޯޓުތަކުގައި މަސައްކަތްކުރަމުން ދަނީ ދިރިއުޅުމަށް ބޭނުންވާ އާމްދަނީ ހޯދުމަށް ކަމަށެވެ. މީގެ އިތުރުން ރިޒޯޓުތައް ހުއްޓުވުމުން ވަޒީފާ ގެއްލޭނެ ކަމަށާއި އެފަދަ ހާލަތެއް މެދުވެރިވެއްޖެނަމަ އެމީހުންނާއި އެމީހުންގެ ޢާއިލާތައް ބަނޑަށް ޖެހޭނެ ކަމަށެވެ.

ވިލާގެ ރިޒޯޓެއްގައި އޭރުގެ ސަރުކާރާ ދެކޮޅަށް ކުރި އިޙްތިޖާޟުގެ ތެރެއިން, ފޮޓޯ: މިހާރު ނޫސް

މާޒީގައި ކަންތައްތައް މިހެން ހިނގާފައިވާއިރު، 30 ސެޕްޓެމްބަރގައި ބާއްވާ އިންތިހާބުން ސަރުކާރު ބަލިވެއްޖެނަމަ، ވިލާ ކުންފުންޏާއި އެ ކުންފުނީގެ މުވައްޒަފުންގެ ކުރިމަގަށް ވާނީ ކިހިނެއް ބާއެވެ؟ މި ސުވާލު އުފެދޭ އެންމެ މުހިންމު ސަބަބަކީ, ރައީސް ޔާމިން ޖޭޕީއާ އެކު ކޯލިޝަން ހައްދަވައިގެން 2013 ގައި ވެރިކަމަށް ވަޑައިގެންނެވި ނަމަވެސް, ފަހުން ކުލަވަރު ބަދަލުވީތީއެވެ. ނަމަވެސް 2018 ގައި އެމްޑީޕީއިން ޖޭޕީއާ އެކު ހެދި ކޯލިޝަން ދައުރު ނިމެންދެން ދެމިއޮވެ, ޤާސިމް އިބްރާޙިމްގެ އެއްވެސް ވިޔަފާރިއަކަށް ރައީސް ޞާލިޙްގެ ވެރިކަމުގައި ސިޔާސީ ގޮތުން ނޭދެވޭ އެއްވެސް އަސަރެއް ކޮށްފައެއް ނުވެއެވެ.