ރައީސް އިބްރާޙިމް މުޙައްމަދު ޞާލިޙްގެ އުފަން ރަށް ކަމުގައިވާ ޅ. ހިންނަވަރުން, އެމަނިކުފާނު 2018 ވަނަ އަހަރުގެ ރިޔާސީ އިންތިހާބުގައި، ރައީސް އަބްދުﷲ ޔާމިން އަބްދުލް ޤައްޔޫމާއި ވާދަކުރައްވައި ހޯއްދެވި ވަރަށް ވުރެން ބޮޑު އިންސައްތައެއް، މިދިޔަ ހޮނިހިރު ދުވަހު ބޭއްވި މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި ހޯއްދަވައިފިއެވެ.

2018 ވަނަ އަހަރުގެ ރިޔާސީ އިންތިހާބުގައި ރައީސް ޞާލިޙަށް ހިންނަވަރުން ޖުމްލަ ލިބިވަޑައިގެންނެވީ %56.8 ވޯޓެވެ. އެއީ 1،259 ވޯޓެވެ. އަދި ރައީސް ޔާމީނަށް 956 ވޯޓާއި އެކު ލިބިވަޑައިގެންނެވީ %43.2 އެވެ. އެ ފަހަރު ވޯޓު ލެވޭ އިންސައްތައިގެ %90.9 މީހުން ވޯޓުލާން ނިކުތެވެ.

ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރުތަމަ ބުރުގައި ރައީސް ޞާލިޙަށް ހިންނަވަރުން ޖުމްލަ ލިބިވަޑައިގެންނެވީ %60.2 ވޯޓެވެ. އަދި ޑރ. މުޙައްމަދު މުއިއްޒަށް ލިބިވަޑައިގެންނެވީ %37.3 ވޯޓެވެ. މި ފަހަރު ހިންނަވަރުން ވޯޓުލާން ނިކުތީ ޖުމްލަ %79.3 މީހުންނެވެ. އެހެންކަމުން ގިނަ ބަޔަކު ދެވަނަ ބުރުގައި ވޯޓުލާން ނިކުމެއްޖެނަމަ މި ފަރަގު ދެވަނަ ބުރުގައި ބޮޑުވާނެކަމަށް ލަފާކުރެވެއެވެ.

އެ މަނިކުފާނަށް ހިންނަވަރުގައި އޮންނަ ތާއީދު އަހަރަކަށް ވުރެން އަހަރެއް އިތުރުވަމުން އަންނަ ކަމަށް ތަފާސް ހިސާބުތަކުން ފާހަގަ ކުރެވެއެވެ. އެގޮތުން 2009 ވަނަ އަހަރުގެ މަޖިލިސް އިންތިހާބުގައި އެ މަނިކުފާނަށް ލިބިވަޑައިގަތީ %50.99 ވޯޓެވެ. އަދި 2014 ވަނަ އަހަރުގެ މަޖިލިސް އިންތިހާބުން %52.6 ހޯއްދެވިއެވެ. އޭގެ ފަހުން ރިޔާސީ އިންތިހާބުތަކުގައި މި ހޯއްދެވީ %56.8 އާއި %60.2 ވޯޓެވެ.