ރިޔާސީ އިންތިޚާބުގެ ފުރަތަމަ ބުރުގެ ވަގުތީ ނަތީޖާ އިލެކްޝަންސް ކޮމިޝަނުން އިޢުލާނުކޮށްފިއެވެ.

އިލެކްޝަންސް ކޮމިޝަންގެ ރަސްމީ ވެބްސައިޓްގައި މިހާރު ވަގުތީ ނަތީޖާ އާއްމުކޮށްފައި ވާއިރު، މީޑިއާތަކުން ގެނެސްދިން ވަގުތީ ނަތީޖާއާ މާބޮޑު ތަފާތެއް ނެތެެވެ. އިންތިޚާބުގެ ފުރަތަމަ ބުރުގައި އެންމެ ކުރީގައި އުޅުއްވަނީ، އިދިކޮޅު ކެންޑިޑޭޓް ޑރ މުހައްމަދު މުޢިއްޒާއި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.

ރިޔާސީ ިއންތިޚާބުގެ ފުރަތަމަ ބުރުގައި ޕީއެންސީގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒަށް ލިބިވަޑައިގެންނެވީ، 101،613 ވޯޓެވެ. އެމްޑީޕީގެ ރިޔާސީ ކެންޑިޑޭޓް އިބްރާހީމް މުޙައްމަދު ޞާލިޙަށް، ލިބިވަޑައިގެންނެވީ، 86،151 ވޯޓެވެ.

މިއިންތިޚާބުގައި ވޯޓުދިނުމުގެ ހައްޤު ލިބިފައި ވަނީ، 282،395 މީހުންނަށެވެ. އޭގެ ތެރެއިން އިންތތިޚާބުގައި ވޯޓުދީފައި ވަނީ 225،446 މީހުންނެވެ. 4833 މީހުން ލާފައިވާ ވޯޓު ބާޠިލްވިއެވެ.

ރިޔާސީ އިންތިޚާބުގެ ދެވަނަ ބުރު އޮންނާނީ، މި ހިނގާ ސެޕްޓެންބަރު މަހުގެ 30ވާ ހޮނިހިރު ދުވަހުގައެވެ.