ރާއްޖޭގެ މައި ދޮރާށި, ވެލާނާ އިންޓަނޭޝަނަލް އެއާޕޯޓަށް އޭވިއޭޝަން ފިއުލް އަދި ގޭސްއޮއިލް ފޯރުކޮށްދިނުމުގެ އެސްޓީއޯއިން ވެފައިވާ އެއްބަސްވުން އައުކޮށްފިއެވެ. މި އެއްބަސްވުމުގެ ދަށުން 31 މާރިޗު 2024 އާއި ހަމައަށް އެސްޓީއޯއިން އޭވިއޭޝަން ފިއުލް އަދި ގޭސްއޮއިލް ވެލާނާ އިންޓަނޭޝަނަލް އެއާޕޯޓަށް ފޯރުކޮށްދޭން ޖެހޭނެއެވެ. 

އެސްޓީއޯގެ ފަރާތުން މި އެއްބަސްވުމުގައި ސޮއި ކުރެއްވީ އެސްޓީއޯގެ މެނޭޖިން ޑިރެކްޓަރ އަބްދުﷲ ސައީދު އެވެ. އަދި އެމްއޭސީއެލްގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރ މަޙުޖޫބު ޝުޖާޢުއެވެ. 

އައު އެއްބަސްވުމުގެ ދަށުން އެސްޓޯއޯއިން ސަޕްލައި ކުރުމަށް އެއްބަސްވެފައި މިވަނީ އޭވިއޭޝަން ފިއުލްގެ 1.5 މިލިއަން ފީފާ އާއި ގޭސްއޮއިލްގެ 80،000 ފީފާ އެވެ.

އެސްޓީއޯއިން އެމްއޭސީއެލް އަށް ބޭނުންވާ ތެޔޮ ފޯރުކޮށްދިނުމަށް އެސްޓީއޯގެ އަމިއްލަ ޓޭންކަރު އެމްޓީ އަލިމަސް ހިމެނޭ ގޮތަށް ދެ ޓޭންކަރެއް ބޭނުންކުރެއެވެ. އަދި އެސްޓީއޯއިން އަންނަނީ 2011 ވަނަ އަހަރުން ފެށިގެން އެމްއޭސީއެލްއަށް ބޭނުންވާ އޭވިއޭޝަން ފިއުލް އަދި ގޭސްއޮއިލް ފޯރުކޮށްދެމުންނެވެ.