އިދިކޮޅުން ފެތުރި ދޮގުތަކަށް ރައްދުނުދެވުމަކީ ކެންޕެއިންގައި ދިމާވި އެންމެ ބޮޑު މައްސަލަކަމަށް ރައީސް އިބްރާހިމް މުހައްމަދު ސާލިހް ވިދާޅުވެއްޖެއެވެ. ރައީސް ވިދާޅުވީ، ދެވަނަ ބުރުގައި ހާމަކުރެވެންހުރި ހުރިހާ އެއްޗެއް ހާމަކޮށް އިތުރަށް ހަގީގަތް އޮޅުންފިލުވައިދެއްވާނެ ކަމަށެވެ. ރައީސް މިހެން ވިދާޅުވީ، ރާއްޖެ ޓީވީއަށް ދެއްވި ފޯނު އިންޓަވިއުއެއްގައެވެ.

ރައީސް ވިދާޅުވީ ގައުމުގެ މިނިވަންކަން ގެއްލުވާލަން ސަރުކާރުން މަސައްކަތް ކޮށްފައި ހުރިކަމަށް ބުނެ ދޮގުތައް އިދިކޮޅުން ކެމްޕޭނު ތެރޭގައި ފަތުރާފައިވާ ކަމަށެވެ. މިގޮތައް އިޝާރާތްކުރެއްވީ ދެ ވަނަ ދައުރަކަށް އެ މަނިކުފާނު އިންތިހާބު ވެއްޖެ ނަމަ، ރާއްޖެ އިންޑިއާގެ "ސްޓޭޓަކަށް" ވެގެންދާނެ ކަމަށް ފެތުރި ދޮގު ވާހަކަތަކަށެވެ. 

"އެއީ އެންމެ ބޮޑު ޗެލެންޖު ފުރަތަމަ ބުރުގައި، އިރާދަކުރެއްވިއްޔާ މި ބުރުގައި ހާމަކުރެވެން ހުރި ހުރިހާ އެއްޗެއް އަޅުގަނޑުމެން ރައްޔިތުންނަށް ހާމަކޮށްދޭނަން، އެއީ ދޮގު ކަމަށް، އޭގަ ރާއްޖޭގެ މިނިވަންކަމާއި ރާއްޖޭގެ ސަރަހައްދުގެ ބައެއް ގެއްލޭ ގޮތަށް އެއްވެސް ކަމެއް ކޮށްފަ ނޯންނާނެ ކަން،" ރައީސް ވިދާޅުވިއެވެ.

ފުރަތަމަ ބުރުގެ ތަޖުރިބާއަށް ބަލާއިރު، ގިނަ ދާއިރާތަކެއްގައި، އެމްޑީޕީއަށް ވޯޓު ދޭނެ ކަމަށް ބުނެފައިވާ މީހުން ނެރެވިފައި ނެތް ކަމަށް ވެސް ރައީސް ސޯލިހު ވިދާޅުވި އެވެ.

ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ 39 އިންސައްތަ ވޯޓެވެ. އެންމެ ގިނަ ވޯޓު ލިބުނީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. އޭނާއަށް ވޯޓުލީ މީހުންގެ 101،613 ލިބުނުއިރު އެއީ 46 އިންސައްތަ އެވެ.