9 ސެޕްޓެމްބަރު 2023 ވީ ހޮނިހިރު ދުވަހު ބޭއްވުނު ރިޔާސީ އިންތިހާބުގައި ވާދަކުރެއްވި ޕީޕީއެމް ޕީއެންސީގެ ރިޔާސީ ކެނޑިޑޭޓު ޑރ މުއިއްޒުއަށް ލިބުނު ކާމިޔާބީ ފާހަގަކުރުމުގެ ގޮތުން ބޭއްވުނު ޖަލްސާގައި ވާހަކަ ދައްކަވަމުން މި ގައުމުގައި ދިރުމެއް އެބަ ހުރިކަން ދިވެހިން ދައްކައިދީފިކަމަށް އަދުރޭ ވިދާޅުވެއްޖެއެވެ. ރައީސް ޔާމީނު އަބަދު ވެސް ވިދާޅުވާ "ދިރުމެއް އޮތިއްޔާ އުންމީދެއް ވާނެ"، މި ބަހުގެ ތެދުކަން މިއަދު ހާމަވެއްޖެ ކަމަށް އަދުރޭގެ ވާހަކައިގައި ވަނީ ފާހަގަކުރައްވާފައެވެ. 

މިއާ ގުޅޭގޮތުން ދެއްކެވި ވާހަކަފުޅުގައި އަދުރޭ ފާހަަގަ ކުރެއްވީ މި ކާމިޔާބީން ދޭހަވާ ގޮތުގައި ދިވެހިން ބުނެދިން ވާހަކަތަކެވެ. އެގޮތުން ދިވެހިން ބުނީ މިއީ ދިވެހިންގެ ދިވެހި ގައުމުކަމަށާއި، ދިވެހިންގެ ކިބައިގައި ޤައުމު ސަލާމަތްކުރުމުގެ ހިތްވަރު އެބަ ހުރިކަމާއި، ދިވެހި ވިންދު ދިވެހިންގެ ގައިގައި ޖަހާމަކާއި، ނުވިތާކަށް މިއީ ބޮޑުތަކުރުފާނު އުފަންވި ދިވެހި ޤައުމުކަމަށް ވެސް މި ކާމިޔާބީއިން ދޭހަކޮށްދޭކަމަށް އަދުރޭ ވިދާޅުވެފައިވެއެވެ. މައިގަނޑު ގޮތެއްގައި އަދުރޭގެ ވާހަކަ ހުލާސާ ކޮށްލެވުނީ އަމާން ސުލްހަވެރި ދިވެހިރާއްޖެއެއް ހޯދަން ބަޔަކު ކުރަމުންދާ މަސައްކަތް ހާމަކޮށްދިނުމަށެވެ. 
މިއާ އެކު އަދުރޭ ފަހުރުވެރިކަމާ އެކު ވިދާޅުވީ އޭނާ ޖެއްސެވި ހިސާބު ތެދުވި ވާހަކައެވެ. އަދުރޭ މިހެން ވިދާޅުވެފައި ވަނީ، ރިޔާސީ އިންތިހާބާ ދިމާކޮށް ބޭއްވުނު ޖަލްސާއެއްގައި ދިވެހި ރާއްޖެއިން ވޯޓުލާ މީހުންގެ އިންސަންތައިން ބަލާނަމަ އެމްޑީޕީގެ ކޯލިޝަން ކެނޑިޑޭޓް އިބްރާޙިމް މުޙައްމަދު ޞާލިޙަށް 40 އިންސައްތަ ވޯޓު ވެސް ނުލިބޭނެކަމަށް އަދުރޭ ވިދާޅުވެފައި ވުމުން އެކަމާ ގުޅިނެވެ. އިންތިހާބު ނިމި ވޯޓުގެ ޖުމުލަ ނަތީޖާ ދައްކާ ގޮތުގައި ރައީސުލް ޖުމްހޫރިއްޔާ އިބްރާޙިމް މުޙައްމަދު ޞާލިޙަށް ލިބިފައި ވަނީ 39.09 އިންސައްތައެވެ. މީގެ އިތުރުން މި މަހުގެ 30 ގައި ބޭއްވުމަށް ހަމަޖެހިފައިވާ ރިޔާސީ އިންތިހާބުގެ 2 ވަނަ ބުރުން 60 އިންސައްތައަށް ވުރެ ގިނައިން ވޯޓު ހޯދައިގެން މުއިއްޒު އިންތިހާބު ކާމިޔާބު ކުރާނެކަމަށް އަދުރޭ ވިދާޅުވިއެވެ.

އަދުރޭ ވިދާޅުވީ އޭނާ އެ ޖަލްސާގައި ޖެއްސެވި ހިސާބަކީ ފައްޔާޒު ޖެއްސެވި ހިސާބު ފަދަ ހިސާބަކަށް ނުވާނެކަމަށެވެ. ނަމަވެސް މީގެ 5 އަހަރު ކުރިން އަދުރޭ ޖެއްސެވި ހިސާބު ހަނދުމަ ނުނެތޭ އެތައް ދިވެހިންނެއް އަދިވެސް މި ރާއްޖޭގައި ތިބޭނެކަން ގައިމެވެ. ވީމާ މިއަދު މި ފެންނަނީ ޔަހުޔާ ކާޅު ހިފައިގެން އުޅޭ މަންޒަރު ބާއޭ ހިތާހިތާ ކިޔާނެ ދިވެހިން ވެސް މަދެއް ނުވާނެކަން ގައިމެވެ.