އިންތިހާބުގެ 2 ވަނަ ބުރަށް ތައްޔާރުވުމުގެ މަސައްކަތް ފަށާފައިވާކަމަށާއި ބަޔަކާއި ގުޅިވަޑައިގަންނަވަން ޖެހޭނެކަމަށް އެމްޑީޕީގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙް ވިދާޅުވެއްޖެއެވެ.

ރައީސް މިހެން ވިދާޅުވެފައިވަނީ ރޭ އިންތިހާބުގެ ވަގުތީ ނަތީޖާ ސާފުވިތާ ކުޑައިރުކޮޅެއްފަހުން އެމަނިކުފާނުގެ ރަސްމީ ކެމްޕޭން އޮފީސް ހުންނަ ޝައިންޓްރީއިމާރާތުން ނުކުމެވަޑައިގެންނެވި ވަގުތު ބޭރުގައި ތިބި ނޫސްވެރިން ކުރެއްވި ސުވާލުތަކަށް ޖަވާބުދެއްވަމުންނެވެ.

މިއީ އުންމީދު ކުރެއްވި ނަތީޖާތޯ ސުވާލުކުރެއްވުމުން ރައީސް ވިދާޅުވީ، ވިސްނިފައި ނެތް ބައެއް ކަންތައްތައް އެބަހުރިކަމަށެވެ. އެކަންކަމަށް 2 ވަނަ ބުރަކަށް ތައްޔާރުވާއިރު ވިސްނާވަޑައިގަންނަވާނެކަމަށް ރައީސް ވިދާޅުވިއެވެ.

“އަޅުގަނޑުމެންނަށް ކޮންމެ ގޮތެއްވިއަސް ބަޔަކާއި އެކީގައި ބައިވެރިވާންޖެހޭނެ. އަޅުގަނޑު ހިތުން ޕީޕީއެމްވެސް (ބަޔަކާއި ގުޅުމަށް) މަސައްކަތް ކުރާނެ. އަޅުގަނޑުމެންވެސް ކުރާނެ.” ރައީސް ވިދާޅުވިއެވެ.

އިއްޔެ ބޭއްވި ރިޔާސީ އިންތިހާބުގެ ވަގުތީ ނަތީޖާ ދައްކާގޮތުން ރައީސް އިބްރާހިމް މުހައްމަދު ސާލިހްއަށް ލިބިވަޑައިގަތީ 85900 އެއްހައި ވޯޓެެވެ. މިއީ ވޯޓުލީ މީހުންގެ %39.09 އެވެ.