ރިޔާސީ އިންތިޚާބުގައި ވޯޓުލެވޭނީ ކަޅު ނުވަތަ ނޫކުލައިގެ އާދައިގެ ގަލަމަކުން ކަމަށާއި، އެހެން ކުލަކުލައިގެ ގަލަމުން ފާހަގަ ޖަހައިފިނަމަ ވޯޓު ބާޠިލްވާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ހަބީބު ވިދާޅުވީ އެކި ކުލަކުލައިގެ ގަލަމުން އިންތިޚާބުގައި ފާހަގަ ޖެހުމަށް ބައެއް ފަރާތްތަކުން ރާވަމުން އަންނަކަމުގެ ޝަކުވާ ބައެއް ޕާޓީތަކުން ހުށައަޅަފައިވާކަމަށެވެ. ޤާނޫނުގައިވެސް ބަޔާންކުރަނީ ވޯޓުލާއިރު ފާހަގަ ޖެހުމަށް ބޭނުންކުރެވޭނީ އާދައިގެ ގަލަމެއްކަން ފާހަގަކުރައްވާ ހަބީބު ވިދާޅުވީ ކަޅު ނުވަތަ ނޫ ކުލައިގެ ގަލަމަކުން ނޫން ގޮތަކަށް ވޯޓު ކަރުދާހުގައި ފާހަގަ ޖަހާއިފިނަމަ، ވޯޓު ކަރުދާސް ބާޠިލު ވާނެކަމަށެވެ.

ހަބީބު ވަނީ އިންތިޚާބުގެ ވޯޓުލާ މަޒރުކަޒުތަކުން ފޯރުކޮށްދޭ ގަލަމަކީ އާދައިގެ އަދި ދެލި ހުރިކަން ކަށަވަރު ކުރެވިފައިވާ ގަލަންތަކެއްކަމަށެވެ. އެހެންކަމުން ވޯޓުލާން އަންނައިރު ކޮންމެހެން ގަލަމެއް ގެންނާކަށް ނުޖެހޭނެކަމަށެވެ.

"އިންތިޚާބުތަކާއި ބެހޭ ޢާންމު ޤާނޫނުގައި އަދި ޤަވާޢިދުތަކުގައިވެސް މި ބުނަނީ ވޯޓުލާ މަރުކަޒަށް އަންނަ މީހަކު، އޭނައަށް ވޯޓުލާ މަރުކަޒަށް ވެއްދޭނީ އަދައިގެ ގަލަމެއް އެކަނި. އެހެން އެއްވެސް އިތުރު އެއްޗެއް އޭނާއަކަށް ނުވެއް ގެނެވޭނެ. އެހެންވީމަ ކޮމިޝަނުން އިއްޔެ ނިންމި، ނިންމުމަކީ އާދައިގެ ގަލަމެއްގެ ގޮތުގައި ބެލެވޭނީ ކަޅު ނުވަތަ ނޫ ކުލައިގެ ގަލަމެއް ކަމަށް." ޙަބީބް ވިދާޅުވިއެވެ.

އެއް ފާހަގައަށްވުރެ، އިތުރަށް ފާހަގަ ޖަހައިފިނަމަ ވޯޓު ބާޠިލު ވާނެކަމަށް އިލެކްޝަންސް ކޮމިޝަނުން ވިދާޅުވެއެވެ. އަދި ވޯޓު ކަރުދާހުގައި ހެޔޮ ފާހަގަ ނުވަތަ ރަނގަޅު ފާހަގަ ފިޔަވައި އެހެން ފާހަގައެއް ޖެހުމާއި، ކުރެހުންތައް ކުރެހުމާއި، އަދި އެކިކަހަލަ ނިޝާންތައް ވޯޓު ކަރުދާހުގައި ލިޔުމަކީވެސް ވޯޓު ބާޠިލުވުމުގައި ހިމެނޭ ކަންކަންމެވެ.