ހެލްތް މިނިސްޓްރީން ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއާއި ގުޅިގެން ރާއްޖޭގައި މުޅިން އަލަށް ސިއްހީ ހިދުމަތް ދިނުމަށް ޑްރޯން ޓެކްނޮލޮޖީ ތައާރަފްކޮށްފިއެވެ. މި ޙިދުމަތް ތައާރަފްކޮށްފައިވަނީ "މޯލްޑިވްސް ހެލްތް ލައިން" ގެ ދަށުންނެވެ.  "މޯލްޑިވްސް ހެލްތް ލައިން" އިފްތިތާހުކޮށްފައިވަނީ އިއްޔެ ހަވީޜު ބޭއްވި ރަސްމިއްޔާތެއްގައި ހެލްތް މިނިސްޓަަރ އަޙްމަދު ނަސީމްއެވެ. 

އެސް.ޓީ.އޯއާއި ގުޅިގެން މުޅިން އަލަށް ރާއްޖޭގައި މި ތައާރަފްކުރެވުނު ޑްރޯން ޓެކްނޮލޮޖީ ބޭނުންކޮށްގެން އެއްރަށުން އަނެއްރަށަށް ޑްރޯން މެދުވެރިކޮށް ބަލިމީހުންގެ ސާމްޕަލްއާއި އެމަރޖެންސީ މެޑިސިން ފޮނުވުމުގެ މަސައްކަތްވެސް ވަރަށް އަވަހަށް ފަށާނެކަމަށް ހެލްތް މިނިސްޓްރީން ވިދާޅުވެއެވެ. މޯލްޑިވްސް ހެލްތް ލައިން މި ޕްރޮޖެކްގެ އަގަކީ 54.5 މިލިއަން ރުފިޔާއެވެ. އެގޮތުން މި ލޯންޗްތަކުގެ ޖުލްމަ އަގަކީ 50 މިލިއަން ރުފިޔާއެވެ. އަދި ޑްރޯންތަކުގެ އަގު 4.5 މިލިއަން ރުފިޔާއަށް އަރާކަމަށް ހެލްތް މިނިސްޓްރީން ވިދާޅުވެއެވެ.  

"މޯލްޑިވްސް ހެލްތް ލައިން“ އަކީ ޞިއްޙީ ޚިދުމަތް ހޯދަން އެއް ރަށުން އަނެއްރަށަށް ރައްޔިތުން ކުރަމުން އައި ދަތުރު ހުއްޓުވުމަކަށް ގެންނާނެ މަޝްރޫއެއްކަމަށް ހެލްތް މިނިސްޓްރީން ވިދާޅުވެއެވެ.

މޯލްޑިވްސް ހެލްޕް ލައިންގެ ދަށުން މަލްޓިޕަރޕަސްކޮށް ބޭނުންކުރެވޭގޮތަށް ފަރުމާކޮށްފައިވާ 20 ސްޕީޑް ލޯންޗް 20 އަތޮޅަށް ފޯރުކޮށްދޭނެއެވެ. މީގެތެރެއިން 7 އަތޮޅަކަށް މިހާރު ވަނީ ސްޕީޑްބޯޓް ހަވާލުކޮށްފައެވެ. 

ރާއްޖޭގެ ޞިއްޙީ ނިޒާމަކީ ލާމަރުކަޒީ ނިޒާމުން ކުރިއަށްގެންދެވޭ ނިޒާމަކަށް ހެއްދެވުމަކީ މި ސަރުކާރުގެ އަމާޒެކެވެ. އެގޮތުން މި ތަޢާރަފްވެގެންދިޔަ "މޯލްޑިވްސް ހެލްތް ލައިން" އަކީ މިކަމަށް އެޅިގެންދިޔަ މުހިންމު ފިޔަވަޅެއްކަމަށް ހެލްތް މިނިސްޓްރީން ވިދާޅުވެއެވެ.

"މޯލްޑިވްސް ހެލްތް ލައިން"ގެ ދަށުން އެކި ދާއިރާގެ ޑޮކްޓަރުން ވަކި ޕްލޭނެއްގެ ދަށުން ޤަވައިދުން ރަށްރަށަށްގޮސް އައުޓް-ރީޗް ޕްރޮގްރާމްތައް ހިންގާނެއެވެ. މީގެ ސަބަބުން ރައްޔިތުން ޞިއްޙީ ޚިދުމަތް ހޯދަން އެއްރަށުން އަނެއްރަށަށް ދާންޖެހޭ ޖެހުމަށް ކޮންމެވެސް ވަރެއްގެ ހައްލެއް ލިބިގެންދާނެކަމަށް ހެލްތް މިނިސްޓްރީން ވިދާޅުވެއެވެ.