ރިޔާސީ އިންތިހާބުގައި ވޯޓުލުމާ މެދު ވަކި ގޮތެއް ނުނިންމާ ތިބި މީހުން ވެސް އެމްޑީޕީއަށް ވޯޓު ދޭން މިހާރު ނިންމަމުން އަންނަ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ. ރައީސް މިހެން ވިދާޅުވީ، ހދ.ކުމުންދޫގައި ބޭއްވި ކެންޕެއިން ހަރަކާތެއްގައެވެ.

ރައީސް ވިދާޅުވީ، ކެމްޕޭނަށް ކުރައްވަމުން ގެންދަވާ ދަތުރުފުޅުތަކުން ފެނިވަޑައިގަންނަވަނީ ގިނަ ބަޔަކު އެމްޑީޕީއާ އެކު، އެއް ބުރުން އިންތިހާބު ނިންމަން ތައްޔާރަށް ތިބި ތަން ކަމަށެވެ.

ކުމުންދޫ އިން ރައީސް އަށް މަރުހަބާ ކިއުން

ހދ. އަތޮޅަށް ކުރައްވަމުން ގެންދަވާ ދަތުރުފުޅުގައި ވެސް ފެނިވަޑައިގަންނަވަނީ އެ މަންޒަރު ކަމަށް ރައީސް ވަނީ ވިދާޅުވެފައެވެ. 

"ދަތުރުކުރަމުން މި ދާއިރުގައި މިހާރު ފެންނަ ބަދަލެއް އަޅުގަނޑަށް އެބަ ހާމަވޭ. ކުރިން ބައެއް ރަށްރަށުގައި ވަކި ގޮތެެއް ނުނިންމާ ތިބި ބޭފުޅުން ގޮތް ނިންމަމުން ދާތަން. ބޮޑުކޮށް، ބޮޑުކޮށް ކޮންމެ ރަށަކުން އެބޭފުޅުން އެމްޑީޕީއާ ގުޅިވަޑައިގެން މިކަން ނިންމަން އެއްބުރުން ހިފާފައި ތިބި ތަން އަޅުގަނޑަށް ފެންނަނީ،" ރައީސް ވިދާޅުވި އެވެ.

ރައީސް އިބްރާހިމް މުހައްމަދު ސާލިހްގެ ކެންޕެއިން ހަރަކާތްތައް ރާއްޖޭގެ އެކި ކަންކޮޅުތަކުގައި ވަރަށް ފޯޜީގައި ދަނީ ކުރިއަށްގެންދަމުންނެވެ. އެގޮތުން މިހާރުވެސް އެމަނިކުފާނު ވަނީ ރާއްޖޭގެ 100 އަށްވުރެ ގިނަ ރަށައް ވަޑައިގެންފައެވެ.

ކެމްޕޭނުގައި ރަށްރަށަށް ވަޑައިގެން ރައީސް ގެންދަވަނީ އަންނަ ދައުރަށް އިންތިހާބުވެވަޑައިގެންފި ނަމަ، އެ ރަށަކަށް ކޮށްދެއްވާނެ ކަންތައްތައް ވިދާޅުވަމުންނެވެ. 

ކުމުންދޫގެ ދޮށީ އުމުރުގެ ބަޔަކު ރައީސްއަށް މަރުހަބާ ކިޔުމަށް ނިކުމެ