އަތޮޅުތަކުގެ ރަށްތައް ތަރައްޤީކުރުމަށް މިދައުރުގެ ތެރޭގައި ވަރަށް ގިނަ މަސައްކަތްތަކެއް ކުރެވިފައިވާ ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރާއްޖެ ޓީވީގެ ފަށާއިރު ޕްރޮގްރާމަށް ދެއްވި ބަސްދީ ގަތުމުގައެވެ.

ރައީސުލްޖުމްހޫރިއްޔާ ވިދާޅުވީ، ކޯވިޑް-19އާއި ގުޅިގެން ގެއްލިދިޔަ ދެއަހަރެއްހާ ދުވަސް ނުހިމަނުއްވައި، މިދައުރުގެ ތެރޭގައި ތަރައްޤީއަށް ވަރަށް ގިނަ މަސައްކަތްތަކެއް ކުރެއްވުނު ކަމަށް ޤަބޫލު ކުރައްވާކަމަށެވެ. މިގޮތުން އަތޮޅުތަކުގެ ރަށްރަށުގެ ތަރައްޤީއަށް ކުރެއްވުނު މުހިއްމު ކަންކަމުގެ ތެރޭގައި ރަށްރަށުގައި ފެނާައި ނަރުދަމާގެ ނިޒާމްތައް ޤާއިމްކޮށްދެއްވުމާއި، ބަނދަރުތައް ހެދުމާއި ސްކޫލުތަަކަށް ބޭނުންވާ ކްލާސްރޫމްތަކާއި، މަލްޓިޕަރޕަސް ހޯލުތައް ބިނާކުރެއްވުމާއި، ރަށްރަށުގައި ކަރަންޓްގެ ޚިދުމަތް ރަނގަޅު ކުރުމަށް ކުރެއްވިފައިވާ މަސައްކަތްތައް އެމަނިކުފާނު ފާހަގަކުރެއްވިއެވެ. 

މީގެ އިތުރުން ރައީސުލްޖުމްހޫރިއްޔާ ފާހަގަކުރެއްވި އަނެއް ކަމަކީ މިދައުރުގެ ތެރޭގައި ރާއްޖޭގައި ހަމަޖެހުން ޤާއިމްކުރެވިފައި އޮތުމެވެ. މިގޮތުން މިދައުރު ފެށުމާއި ހަމައަށް މާލޭގެ މަގުތައްމަތީގައި ހިނގަމުން މީހުންމެރުމާއި ގޭންގް މާރާމާރީތައް ހުއްޓުވި މަގުތައް އަމާންތަނަކަށް ހެދިފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ. އަދި މަގުމަތީގެ އަމާންކަން ދެމެހެއްޓުމަށްޓަކައި ފުލުހުންނާއި ސިފައިން ކުރެއްވި މަސައްކަތްތައް ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ މިދައުރަކީ، ރާއްޖޭގައި އިޖުތިމާޢީ ހަމަޖެހުމާއި ސިޔާސީ ހަމަޖެހުން އެންމެ ބޮޑަށް އޮތް ދައުރެވެ. އަދި ސިޔާސީ ފަރާތްތަކަށާއި، ނޫސްވެރިންނާއި ވިޔަފާރިވެރިންނަށްވެސް އެންމެ މިނިވަންކަމާއި އެކު މަސައްކަތް ކުރުމަށް ފުރުޞަތު ލިބިގެން ދިޔަ ދައުރެވެ.