ރިޔާސީ އިންތިހާބުގައި އެއްވެސް ސިޔާސީ ޕާޓީއަކުން އިލެކްޝަން ކޮމިޝަން (އީސީ) އަށް ނުފޫޒު ފޯރުވައި މަކަރ ހެދުމުގެ ޖާގައެއް ނޯންނާނެ ކަމަށް އެ ކޮމިޝަނުން ވިދާޅުވެއްޖެއެވެ.

އީސީ އިން މިއަދު ބޭއްވި ބައްދަލުވުމުގައި އެ ކޮމިޝަންގެ ނައިބު ރައީސް އިސްމާއީލް ހަބީބް ވިދާޅުވީ ވޯޓުލާ މަރުކަޒުގެ އިންތިޒާމްތައް ހަމަޖެހިފައި ހުންނާނީ މީހަކު ވޯޓުލާ މަރުކަޒަށް ވަންނަ ހިސާބުން ނިކުންނަންވަންދެން ހަރަކާތްތައް ފެންނަ ގޮތަށް ކަމަށެވެ. ހަމައެކަނި ނުފެންނާނީ ކަރުދާހުގައި ފާހަގަ ޖަހާ ވަގުތުގައި އެކަނި ކަމަށެވެ.

ވޯޓު ކަރުދާސް ހުންނާނީ ވަކި ތައްގަނޑެއް ޖަހާފައި ކަމަށާއި ބޭރުން ގެނެސް ވޯޓު ކަރުދާސްކޮޅެއް ފޮއްޓަށް ލިޔަސް އެ ކަރުދާސްކޮޅު ފާހަގަވާނެ ކަމަށް ހަބީބް ވިދާޅުވި އެވެ.

އެއްވެސް ހިސާބެއްގައި މަކަރު ހެދުމުގެ ފުރުސަތު މި އިންތިހާބުގައި އެއްވެސް ފަރާތަކަށް ލިބިގެން ނުދާނެ ކަމަށް އޭނާ ވިދާޅުވިއެވެ. ވޯޓުލާ މަރުކަޒަށް ވަންނަ މީހުންނަށް އެއްވެސް މީހެއްގެ ނުފޫޒު ނުފޯރާނެ ކަމުގެ ފުރިހަމަ ޔަގީންކަންވެސް އޭނާ ވަނީ އަރުވާފައެވެ.

"މިއިންތިހާބުގެ ކަންކަން އެންމެ ފުރިހަމައަށް ކުރުމަށްޓަކައި، ގާނޫނާ ގަވާއިދުގެ އިމުގެ ތެރެއިން ކުރުމަށްޓަކައި އިލްކެޝަން ކޮމިޝަނަށް ކުރެވެން ހުރި ހުރިހާ މަސައްކަތެއް އަޅުގަނޑުމެން ކޮމިޝަނުން ކުރާނަން." ހަބީބް ވިދާޅުވި އެވެ.

ހަބީބް ވަނީ ކެމްޕޭނު ކުރަން ހުރިހާ ކެންޑިޑޭޓުންނަށް ވެސް ފުރުސަތު ދިނުމަށް ގޮވާލާފައެވެ. ހާއްސަ ގޮތެއްގައި ކެމްޕޭނު ހަރަކާތްތައް ނިންމާލަން ހުކުރު ދުވަހު ބާއްވާ އިވެންޓްތައް ރަގަޅަށް އިންތިޒާމްކޮށްގެން ކުރިއަށް ގެންދިއުމަށް އެދިވަޑައިގަތެވެ.