ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްގެ ވެރިކަމުގެ މި ދައުރުގައި ކުރެވުނު އެންމެ ހިތްހަމަޖެހޭ މަސައްކަތަކީ ހިލޭ ޑިގްރީ ޕްރޮގްރާމްކަމަށް އެމަނިކުފާނު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރާއްޖެ ޓީވީގެ "ފަށާއިރު" ޕްރޮގްރާމްގައި ވާހަކަފުޅު ދައްކަވަމުންނެވެ. 

ރައީސް ވިދާޅުވީ، ކޯވިޑްގެ އާލަމީ ވަބާއާއިއެކު ގެއްލުނު 2 އަހަރު ކެނޑުމަށްފަހު އެ ލިބުނު 3 އަހަރު ތެރޭގައި ވަރަށް ގިނަ މަސައްކަތް ކުރެވިފައިވާކަމަށެވެ. އޭގެތެރޭގައި ފެނާއި ނަރުދަމާއާއި، ބަނދަރުތައް ހެދުމާއި، ސްކޫލްތަކުގެ ކްލާސްރޫމާއި މަލްޓިޕާފަސް ހޯލްތަކާއި، ރަށްރަށުގައި ކަރަންޓް ރަނގަޅަށް ލިބޭނެ ގޮތް ހެދުން ފަދަ މަސައްކަތްތައް ހިމެނޭކަމަށެވެ. 

މި ހުރިހައި މަސައްކަތެއްގެ ތެރެއިންވެސް އެންމެ ހިތްހަމަޖެހޭ މަސައްކަތަކަށް ކުރެވުނު ކަމަކީ ހިލޭ ޑިގްރީ ޕްރޮގްރާމް ފެށި އެތައް ކުދިންތަކަކަށް ހިލޭ ޑިގްރީ ހެދުމުގެ މަގު ފަހިކޮށްދެވުންކަން ރައީސް ފާހަގަކުރެއްވިއެވެ. މި ޕްރޮގްރާމަކީ މާދަމާ ސަރުކާރު ހިންގާނެ ގާބިލް ޒުވާނުން އުފެދިގެން ދިޔަ ޕްރޮގްރާމެއްގެ ގޮތުގައި ރައީސް ސިފަކުރެއްވިއެވެ. 

"އެންމެ ފާހަގަކޮށްލެވޭ ދެތިން ކަމެއްގެ ގޮތުގައި ދަންނަވާނީ ކުދިންނަށް ތައުލީމު، ހާއްސަކޮށް މަތީ ތައުލީމު ހާސިލްކުރުމަށްޓަކައި މި ހުޅުވާލެވުނު ފުރުސަތު. ހިލޭ ޑިގްރީއާއި ސްކޮލަރޝިޕް ދިނުމަށް ސަރުކާރުން މި ފެށި މަޝްރޫއު. އަޅުގަނޑު ހިތުން މިއީ މުޅި ރާއްޖެއަށް ވަރަށް ބޮޑު ބަދަލެއް ގެނުވާނެ ކަމެއް. ރާއްޖެއަށް ވަރަށް ބޮޑެތި ހެޔޮ ބަދަލުތަކެއް މިއަންނަނީ. އަޅުގަނޑުމެންނަށް ފަހުގައި ސަރުކާރު ހިންގަން ނިކުންނާނީ މިއަދުގެ ޒުވާނުން. އެކުދިންނަށް ރަނގަޅު ތަމްރީނާއި ތައުލީމު ލިބުނީމަ ދުނިޔެއަށް ލޯހުޅުވިގެން ތިބި ޒުވާނުންތަކެއް ދައުލަތް ހިންގަން ނިކުތީމަ އަންނާނެ ހެޔޮ ބަދަލު އަޅުގަނޑަށް މިހާރުވެސް އިހްސާސް ކުރެވޭ." ރައީސް ވިދާޅުވިއެވެ.

ރައީސް ވިދާޅުވީ، ހިލޭ ޑިގްރީ ޕްރޮގްރާމް ނެގުމަށްފަހު ދެން އެންމެ އުފާވާކަމަކީ މަގުމަތީގެ އަމާންކަން ޤާއިމްކުރުމަށް ފެށި މަސައްކަތުގެ ނަތީޖާ ފެނުންކަމަށެވެ. ފުލުހުންނާއި ސިފައިން މަގުމަތީގެ އަމާންކަން ޤާއިމްކުރުމަށް ގިނަ މަސައްކަތެއް ކުރެއްވިކަން ރައީސް ފާހަގަކުރެއްވިއެވެ. އެމަނިކުފާނު ވެރިކަމާއި ހަވާލުވިއިރު ގޭންގްތަކުގެ މައްސަލަ ބޮޑުވެ ފުލުހުންނާއި ސިފައިން މަގުމަތީގައި ފޯރިމަރަންޖެހުނުކަން ވަނީ ފާހަގަކުރައްވާފައެވެ.

މި ދައުރުގައި ކުރަން ބޭނުންވި އެކަމަކު ނުކުރެވުނު ކަމަކީ ރާއްޖޭގައި އިންޑިއަން އޯޝަން ގޭމްސް ބޭއްވުންކަމަށް ރައީސް ވަނީ ވިދާޅުވެފައެވެ. އައިއޯއަޖީ ނުބޭއްވުނު ސަބަބެއްކަމަށް ރައީސް ވިދާޅުވީ، ކޯވިޑާއި ގުޅިގެން އެކަމަށް ތައްޔާރުނުވެވުމެވެ.

މި ޕްރޮގްރާމްގައި ރައީސް ވަނީ ދެވަނަ ދައުރަކަށްފަހު ސިޔާސީ މަސައްކަތްތަކުން ރިޓަޔަރ ކުރައްވަން ގަސްތުކުރައްވާ ކަމަށްވެސް ވިދާޅުވެފައެވެ.