މިމަހު އޮންނަ ރިޔާސީ އިންތިޚާބުގައި ފުލުހުން ބޮޑީ ވޯން ކެމެރާ ބޭނުން ކުރާނެކަމަށް އެ އިދާރާއިން ބުނެފިއެވެ. ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑެޕިއުޓީ ކޮމާންޑަރު ޗީފް ސުޕްރިންޓެންޑް އަހުމަދު މުސްލިމް ވިދާޅުވީ އިންތިޚާބުގެ ސެކިއުރިޓީ ކަންކަން ބެލެހެއްޓުމަށް ފުލުހުން ގިނަގުނަ މަސައްކަތްތަކެއް ކުރައްވަމުން ގެންދަވާކަމަށެވެ. 

މުސްލިމް ވިދާޅުވީ، ޤާނޫނާއި ގަވައިދާއި އެއްގޮތައް ބޮޑީ ވޯން ކެމެރާ އާއިއެކު ފުލުހުން ވޯޓުލާ މަރުކަޒު ތެރޭގައާއި، ޕޯލިން ސިސްޓަމް ތަކުގައިވެސް ހަރަކާތްތެރިވާނެކަމަށެވެ. ރިޔާސީ އިންތިޚާބުގެ ސަލާމަތީ ކަންކަން ފުލުހުން ބަލަހައްޓަމުންދާއިރު، މިނިވަން އިންސާފުވެރި އިންތިޚާބަކަށް ހުރަސްއެޅޭފަދަ އެއްވެސް މައްސަލައެއް މިހާތަނަށް ފުލުހުންނަށް ހުށަހެޅިފައި ނުވާކަމަށް މުސްލިމު ވިދާޅުވިއެވެ.

މިހާރު ފުލުހުން ކުރަމުންދާ އެންމެ މުހިންމު މަސައްކަތަކީ ވޯޓު ކަރުދާސްތަކާއި، ވޯޓުލާ މަރުކަޒުތަކަށް ބޭނުންވާ ތަކެތި އިލެކްޝަންސްގެ ބެއްލެވުމުގެ ދަށުން ރަށްރަށަށް ގެންދިއުމުގެ މަސައްކަތްކަތެވެ. ވޯޓު ކަރުދާސް ގެންދިއުމަށްފަހު އޭގެ ސެކިއުރިޓީގެ ކަންކަން ބަލަހައްޓަމުން ގެންދަނީވެސް ފުލުހުންނެވެ. 

އިންތިޚާބުގެ ކަންކަން އަމާންކަމާއި އޮމާންކަމާއެކު ކުރިއަށް ގެންދިއުމުގައި މުވައްސަސާތަކުން ގުޅިގެން ކުރާ މަސައްކަތުގައި ފުލުހުންގެ ފުރިހަމަ އެއްބާރުލުން އޮންނާނެކަމަށް ފުލުހުން ވިދާޅުވެއެވެ.