މި ސަރުކާރުން ކުރިއަށް ގެންދާ ބިންވެރިޔާގެ ސްކީމް ދަށުން ގޯތި ލިބުނު މީހުންގެ ނަމުގައި މިހާރު އޮތް ބަންޑާރަ ގޯތި ދޫކޮށްލުމަށް ދީފައިވާ މުއްދަތު 5 އަހަރަށް ބަދަލުކުރަން ހައުސިން މިނިސްޓްރީން ނިންމައިފިއެވެ.

ޕްލޭނިން މިނިސްޓްރީން ވިދާޅުވީ، މިގެނައި ބަދަލާއެކު މިހާރު ސޮއިކުރާ ތާރީޚުން ފެށިގެން ފަސް އަހަރު ތެރޭގައި ކުރިން އޮތް ބަންޑާރަ ގޯތި ދޫކޮށްލަން ޖެހޭނެކަމަށެވެ. ކުރިން އޮންނަ ގޮތުން ސޮއިކުރާ ތާރީޚުން ފެށިގެން 3 މަސްތެރޭގައި ގޯތި ދޫކޮށްލުމަށް ޤާނޫނީގޮތުން ކުރަންޖެހޭ މަސައްކަތް ފަށަންޖެހެއެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށްޓަކައި ހިންގާ ބިންވެރިޔާ ސްކީމުގެ ދަށުން ގޯއްޗަށް ހުޅުވާލި ފުރުސަތުގައި ޝަރުޠު ހަމަވީ 19639 މީހުންނަށް ގޯތި ލިބުނެއެވެ. އެއީ 9000އަށްވުރެ ގިނަ ބިމެވެ. 

މި ގޯތި ތަކުގެ ތެރެއިން 1250 އަކަފޫޓާއި 1650 އަކަފޫޓާއި 2050 އަކަފޫޓުގެ ގޯތިތައް ދެއްވާނީ ހުޅުމާލެއާއި، ގުޅިފަޅާއި ގިރާވަރު ފަޅުންނެއެވެ. އަދި 2450 އަކަފޫޓުން ފެށިގެން 4000 އަކަފޫޓާ ދެމެދުގެ ގޯތިތައް ދޫކުރައްވާނީ ހުޅުމާލެއާއި ގުޅިފަޅުންނެވެ. ސަރުކާރުން މިހާރު އަންނަނީ ބިންވެރިޔާ ސްކީމްގެ ދަށުން މާލޭ ސަރަހައްދުން ގޯތި ލިބުނު ފަރާތްތަކަށް އެ ގޯތީގެ ރެޖިސްޓްރީ ހަވާލުކުމުގެ މަސައްކަތް ކުރަމުންނެވެ.