ކުރިޔަށް ދައުރުގައި، ކާޑެއްދޫ އެއާޕޯޓަކީ އިންޓަނޭޝަނަލް އެއާޕޯޓަކަށް ހައްދަވައި ދެއްވާނެ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، އުފާވެރި އަމާންރާއްޖެ ކެމްޕޭނުގެ ދަށުން، ރޭ ގދ. ތިނަދޫގައި ބޭއްވި ޖަލްސާގައި ވާހަކަފުޅު ދައްވަމަުންނެވެ. މިޖަލްސާގައި ތިނަދޫއަކީ ސިޓީއެއްގެގޮތުގައި ކަނޑައަޅުއްވާފައިވާ ކަންވެސް ރައީސުލްޖުމްހޫރިއްޔާ ވަނީ ޢިއުލާނުކޮށްދެއްވާފައެވެ.

ތިނަދޫގައި ބުދަ ދުވަހު، އިމިގްރޭޝަންގެ ޚިދުމަތް ފައްޓަވައި ދެއްވިކަން ހާމަކުރައްވައި، ރައީސް ވިދާޅުވީ، ދެން ތިނަދޫގެ ރައްޔިތުން ބޭނުންވާނީ، މާލެ ނުގޮސް ރާއްޖެއިން ބޭރަށް ފުރައިގެން ދެވޭނެގޮތްވުން ކަމަށެވެ. އަދި ޕާސްޕޯޓެއްގެ ބޭނުމަކީވެސް އެއީ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ކާޑެއްދޫ އެއާޕޯޓަކީ، ޤާސިމް އިބްރާހިމްގެ ވިލާ އެއާ އާ ހަވާލުކޮށްގެން ހިންގަމުން އަންނަ އެއާޕޯޓަކަށް ވާއިރު، ރައީސުލްޖުމްހޫރިއްޔާ ވިދާޅުވީ، ސަރުކާރުން ބޭނުންވާ ގޮތަށް ކާޑެއްދޫ އެއާޕޯޓު އިންޓަރނޭޝަނަލް ނުކުރެވޭނެނަމަ، އެކަން ދެން ކުރެވެން އޮތްގޮތެއް ބައްލަވައިގެން އެކަން ކުރައްވާނެ ކަމަށެވެ. މީގެ އިތުރުން އިކޮނޮމިކް ކައުންސިލްގައި މަޝްވަރާކުރެވިފައިވާ ގޮތަށް ތިނަދޫއާ ކައރީގައި އިންޓަރގްރޭޓެޑް ޓުއަރިޒަމް ތަޢާރަފްކޮށް ނިމޭއިރު އެއާޕޯޓް އިންޓަރނޭޝަނަލް ކުރެވިގެންދާނެ ކަމުގައިވެސް ރައީސް ވިދާޅުވިއެވެ.

ގދ. ކާޑެއްދޫ އެއާޕޯޓަކީ، ރާއްޖޭގައި ފުރަތަމަ އެޅުނު ސަރަހައްދީ 5 އެއާޕޯޓްގެ ތެރޭގައި ހިމެނޭ އެއާޕޯޓެކެވެ. ވިލާ އެއާ އާއި ހަވާލުކޮށްފައިވާ އެ އެއާޕޯޓުގެ ތަރައްޤީއަށް ޤާސިމް އިބްރާހިމްގެ ވިލާކުންފުނިން އެއްވެސް މަސައްކަތެއް ނުކުރާކަން، ގދ. އަތޮޅުގެ ރައްޔިތުން ފާހަގަކޮށް އެކަމުގެ ޝަކުވާތައް ކުރަމުން ގެންދެއެވެ.