އަންނަ ސެޕްޓެމްބަރ މަހުގެ 9 ވަނަ ދުވަހު ބާއްވާ ރިޔާސީ އިންތިހާބުގައި 18 އަހަރު ފުރިހަމަވެފައިވާ ކޮންމެ ދިވެހި ރައްޔިތަކަށްވެސް ވޯޓުލެވޭނެއެވެ.

އިލެކްޝަންސް ކޮމިޝަނުން ވިދާޅުވީ އިންތިހާބުގައި ވޯޓުލުމަށްޓަކައި، ބޭނުންކުރެވޭނީ ދިވެހި ރައްޔިތެއްކަން އަންގައިދޭ ކާޑާއި، (އައިޑީ ކާޑު) މުއްދަތު ހަމަ ނުވާ ދިވެހި ޕާސްޕޯޓާއިި، މުއްދަތު ހަމަ ނުވާ ޕާސްޕޯޓް ކާޑު، މުއްދަތު ހަމަނުވާ ޑްރައިވިންގ ލައިސަންސްކަމަށެވެ. އަދި ވޯޓްލުމަށްޓަކައި އޭގެތެރެއިން ކޮންމެވެސް އެއް ޑޮކިއުމަންޓެއްގެ އަސްލު އޮންނަންޖެހޭނެކަމަށާއި، އެ ނޫން ޢެހެން އެއްވެސް ލިޔުމެއް، ވޯޓުލާ މަރުކަޒުން ގަބޫލު ނުކުރާނެކަމަށް ކޮމިޝަނުން ބުނެއެވެ.

އިލެކްޝަންސް ކޮމިޝަނުން ވިދާޅުވީމ އިންތިހާބުގައި ވޯޓްލުމަށް ޑިޖިޓަލް އައިޑީ ބޭނުމެއް ނުކުރެވޭނެކަމަށެވެ. އިލެކްޝަނުން ވިދާޅުވީ ރިޔާސީ އިންތިހާބުގެ އެއްވެސް ކަމެއްގައި، ޑިޖިޓަލް އައިޑީ ކާޑު އަދި އީފާސް ބޭނުން ނުކުރާ ގޮތަށް އެ ކޮމިޝަނުން ނިންމާފައިވާކަމަށެވެ. 

ވޯޓްލާން ބޭނުންވާ އައިޑީ ކާޑުފަދަ ތަކެތީގެ މުއްދަތު ހަމަވެފައިވާނަމަ، ނުވަތަ މުއްދަތު ހަމަވާން ކައިރިވެފައިވާނަމަ، އައު ކުރެއްވުމަށް ކޮމިޝަނުން ވަނީ އިލްތިމާސްކޮށްފައެވެ.

މިފަހަރުގެ ރިޔާސީ އިންތިހާބުގައި ވޯޓްލުމުގެ ހައްގު 282395 މީހަކަށް ލިބިފައިވެއެވެ. މީގެތެރެއިން 27000 އަށްވުރެ ގިނަ މީހުންނަކީ މިފަހަރުގެ އިންތިޚާބުގައި އަލަށް ވޯޓުލާ މީހުންނެވެ.