ބިންވެރިޔާ ސްކީމްގެ ދަށުން ދޫކުރާ ގޯތިތައް ލިބުނު ފަރާތްތަކަށް، ހައުސިންގ މިނިސްޓްރީން ޢިމާރާތާއި ގޯތީގެ ރަޖިސްޓްރީހަދައިދީ ދޫކުރެވޭ ގޮތަށް ޤަވާއިދު ބަދަލުކޮށްފިއެެވެ.

ޤަވާއިދަށް ގެނައި މައިގަނޑު ބަދަލަކީ، ވަކި ސަރަޙައްދެއް ތަރައްޤީކުރުމަށް ކުރިޔަށްގެންދާ ގޯތި ދިނުމުގެ މަޝްރޫޢުތަކުގެ ދަށުން ގޯތި ހަވާލުކުރާއިރު، ގޯތީގެ ދާއިމީ ރަޖިސްޓްރީ ދޫކުރުން، ސަރުކާރުން ކަނޑައަޅާ ވަކި އިދާރާއަކަށް ދެވޭ ގޮތަށް ގެނައި ބަދަލެވެ. މިގޮތުން، ގޯތި ދިނުމަށް ކަނޑައަޅާފައިވާ ސަރަޙައްދަކީ ނުހިއްކައި ނުވަތަ އިން ވަކިނުކޮށް އޮތް ސަރަޙައްދެއްނަމަ އެފަދަ ސަރަޙައްދަކުން ގޯތި ހަވާލުކުރާއިރު ގޯތި ދޫކުރިކަމުގެ ލިޔުމެއް ދޭންޖެހޭނެކަމަށްވެސް ޤަވާއިދުގައި ބުނެފައިވެއެވެ.

އަލަށް ޤަވާއިދަށް މިބަދަލު ގެނައީ، ސަރުކާރުގެ ބިންވެރިޔާ ސްކީމުގެ ދަށުން ދޫކުރާ ގޯތިތައް، ރަޖިސްޓްރީކޮށް، އިމާރާތާއި ގޯތީގެ ރަޖިސްޓްރީތައް ހައްދައި ދިނުމުގައި، މާލޭ ސިޓީކައުންސިލުން ސަރުކާރަށް ފިއްތުންތައް ކުރިމަތި ކުރާނެ ކަމަށް ބެލެވިފައިވާ ދަނޑިވަޅެއްގައެވެ.

މާލޭ ސިޓީގެ މޭޔަރު، ޑރ. މުހައްމަދު މުޢިއްޒު ގެންދަވަނީ، ޕީއެންސީގެ ޓިކެޓްގައި ރިޔާސީ އިންތިޚާބަށް ކުރިމަތިލައްވައި ކެމްޕޭން ކުރައްވަމުންނެވެ. އަދި ސަރުކާރުގެ ބޯހިޔާވަހިކަމުގެ ސިޔާސަތާއި ދެކޮޅަށް ޑރ. މުއިއްޒު ގެންދަވަނީ ކެމްޕޭންކުރައްވަމުންނެވެ.