"ލޯބިވާ މަންމާއެވެ،

އެންމެފަހުން އަޅުގަނޑުމެން އާއިލާއަށް ބިމެއް ލިބިއްޖެއެވެ. ރައީސް ނަޝީދު ދެއްކި ހުވަފެނުގައި ކުލަ ޖައްސާދިނީ @ibusolih އެވެ.

މަންމައަށް އެމް.ޑީ.ޕީ އިން ވީ ވައުދު ފުއްދާދީފިއެވެ!

ބަޔާން ކޮށްދޭން ނޭންގޭހާ އުފާވެރިއެވެ."

މިއީ މި އަހަރުގެ އޯގަސްޓު 18 ވަނަ ދުވަހު އަޙްމަދު ޝުއާއު "އެކްސް" (@obofili) ގައި ޝާއިއުކޮށްފައިވާ އޭނާގެ ފުން އިޙްސާސްތަކެކެވެ. މިއަދު މަންމަ ދުނިޔޭގައި ނެތަސް، މަންމަ ދެކެމުން އައި ބޯހިޔާވަހިކަމުގެ ހުވަފެނުގައި ކުލަޖެހުން ވެގެން ދިޔައީ އޭނާއަށް ފުން ހަނދާންތަކެއް ގެނުވި ކަމަކަށެވެ. ހިތާމައަކީ، މި އުފާވެރި ވަގުތު އައިސް ޖެހުނު އިރު މަންމަ ކައިރީގައި ނެތުމެވެ. މަންމަ ކައިރީގައި ނެތަސް، މަންމަމެންގެ ހެޔޮ ދުއާ އަބަދުވެސް ދަރީންނާއި އެކުގައި ވާނެކަމަށް ބުނޭ ނޫންހެއްޔެވެ.

"ފްރީލޭންސް" ކޮށް ފޮޓޯ ނެގުމާއި ޑިޒައިން ކުރުމުގެ މަސައްކަތް ކުރާ އަޙްމަދު ޝުއާއު (ޝުއާއު)ގެ މި ސޯޝަލް މީޑިއާ ޕޯސްޓް ފެނިފައި "ނޫން" އިން އޭނާއާއި ބައްދަލުކޮށް، އެ އިހްސާސްތައް ކިޔުންތެރިންނަށް ގެނަސްދިނުމުގެ ބޭނުމުގައި ރަގަޅަށް އޮޅުން ފިލުވީމެވެ.

ބޯހިޔާވަހިކަމަކީ ރާއްޖޭގެ ގިނަ ރަށްރަށުގައި އޮތް އިޖްތިމާއީ އެންމެ ބޮޑު އެއް މައްސަލައެވެ. ހާއްސަކޮށް މާލޭ ސަރަހައްދުގައި މިހާރު އެންމެ ހަރުއަޑުން ދެކެވޭ ވާހަކައަކީ މިއީއެވެ. ބިމުގެ ދަތިކަމުގެ ސަބަބުން، މި މައްސަލަ ހައްލު ކުރުމަކީ ބޮޑު ގޮންޖެހުމަކަށް މިވަނީ ވެފައެވެ. އެހެންކަމުން މިކަމަށް ހައްލެއް ހޯދައިދޭނެކަމަށް ގައުމުގެ ވަލިއްޔުލް އަމްރުގެ މަގާމަށް އައިސްފައިވާ ގިނަ ބޭފުޅުން ވަނީ ވައުދު ވެފައެވެ. މިހާތަނަށް އައިއިރު، ފުލެޓް އަޅައިގެން މަދު ބަޔަކަށް ހެޔޮއަގުގައި ބޯހިޔާވަހިކަމެއް ބައެއް ރައީސުންނަށް ހޯދައިދެވިފައިވީ ނަމަވެސް، މާލޭގެ ރައްޔިތުންނަށް މި ފަހަކާޖެހެންދެން ވެސް އިންސާފުވެރި ހައްލެއް ވަނީ ހޯދައިނުދެވިއެވެ.  މާލޭގެ ރައްޔިތުންގެ އާދޭހަކީ، އެހެން ރަށްރަށުގައި ވެސް އެ ރަށެއްގެ ރައްޔިތުންނަށް ބިން ލިބޭހެން، އެމީހުންނަށް ވެސް ބިން ލިބިގެންދިއުމެވެ. އަދި ހަމއެކަނި ފްލެޓް ދިނުމަކީ މާލޭގެ ރައްޔިތުން ހައްގު މިންވަރު ހޯދައިދެވުނީ ނޫން ކަމަށެވެ.

ޝުއާއު އަކީ ވެސް މާލޭ ރައްޔިތެކެވެ. އޭނާގެ އާއިލާގެ ބޯހިޔާވަހިކަމުގެ ހާލަތު ސިފަކޮށްދެމުން ބުނެފައިވަނީ، މާލޭގެ ރައްޔިތެއްގެ ހައިސިއްޔަތުން މިއަދާއި ހަމައަށް ވެސް ދިރިއުޅެމުން އައީ ބޯހިޔާވަހިކަމެއް ޔަގީންނުވެ ކަމަށެވެ.

ޝުއާއު ހިއްސާކޮށްފައިވާ ގޮތުގައި 2013 ވަނަ އަހަރު، އޭނާގެ މަންމައާއި ބައްދަލުކޮށް ރައީސް ނަޝީދުވަނީ އެ އާއިލާއަށް ބޯހިޔާވަހިކަމެއް ހޯދައިދޭނެކަމަށް ވައުދުވެފައެވެ. އޭގެ ހަތް އަހަރު ފަހުން 2020 ވަނަ އަހަރު އައިއިރު ވެސް އެކަން ނުވެއޮތުމުން، ޝުއާއުވަނީ ރައީސް ނަޝީދުގެ މި ވައުދުގެ މަތިން ސޯޝަލް މީޑިއާގައި ހަނދާންކޮށްދީފައެވެ.

އެންމެ ފަހުން ޝުއާއުގެ މަންމަގެ ހުވަފެނުގައި ކުލަ ޖެހިގެން މި ދިޔައީ ރައީސް އިބްރާޙިމް މުޙައްމަދު ޞާލިޙްގެ ވެރިކަމުގައި ކުރިޔަށް މި ގެންދާ ބިންވެރިޔާ ސްކީމްގެ ތެރެއިންނެވެ. މި އުފާވެރިކަން "ނޫން" ގެ ޓީމާ ހިއްސާކުރަމުން ޝުއާއު ހިނިތުންވެލާފައި ބުނީ މިހާރު އޭނާއަކީ ބިންވެރިއެއް ކަމަށެވެ.

ޝުއާއު އާއި އެކު ހޭދަކޮށްލި ވަގުތު ކޮޅުގައި، އޭނާ އެހެން ވާހަކައެއްވެސް ހިއްސާ ކުރިއެވެ. އެއީ އޭނާއަކީ "ފްރީލޭންސް" ކޮށް މަސައްކަތް ކުރަމުން އަންނަ ޒުވާނަކަށް ވީތީ، ކޮވިޑްގެ އާލަމީ ވަބާ ދުނިޔެއަށް ކުރިމަތިވެ، ލިބެމުންދިޔަ އާމްދަނީ ހުއްޓުމުން ދެން ކަންތައްތައް ވީގޮތުގެ ވާހަކައެވެ.

"ފްރީލޭންސް" ކޮށް މަސައްކަތްކުރާ އެހެން މީހުންނެކޭ އެއްގޮތަށް، ކޮވިޑް ވެގެން ދިޔައީ ޝުއާއުއަށް ވެސް ލިބެމުން ދިޔަ އާންދަނީއަށް ހުއްޓުން އައި ކަމަކަށެވެ. ނަމަވެސް ޝުއާއުމެންފަދަ، "ފްރީލޭންސް" ކޮށް މަސައްކަތްކުރަމުންދިޔަ ޒުވާނުންގެ ހިތަށް އެދުވަހު ލިބުން މޮޅިވެރިކަމަށް ނިމުމެއް ގެނަސް، އެމީހުންގެ ދިރިއުޅުމުގެ ހާލަތު ދަށަށް ދިޔަނުދީ، އެމީހުންގެ އަތުގައި އެ ދުވަހު ހިފީ ދިވެހި ސަރުކާރުން ކަމުގައި އޭނާ ކިޔައިދިނެވެ. އެއީ އެ ދުވަސްވަރު ސަރުކާރުން ދޫކުރި ކޮވިޑް ރިލީފް އެހީގެ ވާހަކައެވެ.

ޝުއާއު އިތުރަށް ކިޔައިދިން ގޮތުގައި، އެ ވަގުތު ސަރުކާރުގެ އެފަދަ އެހީއެއް ނުލިބުނުނަމަ ވަރަށް ގިނަ މަސައްކަތްތެރީންތަކެއް މަގުމަތިވެ، ދިރިއުޅުމުގެ ހާލަތު ހިތަށް ވެސް ނުގެނެވޭހާ ދަށަށް ދިޔައީހެވެ. އެއީ "ފްރީލޭންސް" ކޮށް މަސައްކަތްކުރާ ގިނަ ކުދިންނަކީ މާލޭގައި ކުއްޔަށް އުޅެމުން، އާއިލާ ބަލަހައްޓަމުންދާ ބަޔަކަށް ވީތީއެވެ.

ކޮންމެއަކަސް، ޕަބްލިކް ސެކްޓަރގެ މަސައްކަތްތެރީންގެ މުސާރައަށް ކޮވިޑާ ގުޅިގެން މެދުކެނޑުމެއް ނުގެނަސް، ޕްރައިވެޓް ސެކްޓާގެ މަސައްކަތްތެރީންގެ ހައްގުގައި ސަރުކާރުން މި ބުރަ ނޫފުލިނަމަ، ގިނަ އާއިލާތަކަކަށް ކޮވިޑުގެ ސަބަބުން އެތައް ގެއްލުންތަކެއް ވީސްކަން ކަށަވަރެވެ.