ރާއްޖޭގެ ހުރިހާ މިސްކިތްތަކެއްގައި ބަންގި އާއި ގަމަތާ ދެމެދު ހޭދަކުރާ ވަގުތު ދިގުކުރަން އިސްލާމިކް މިނިސްޓްރީން އަންގައިފިއެވެ.

އިސްލާމިކް މިނިސްޓްރީން މިއަދު ބުނީ ބަންގި އާއި ގަމަތާ ދެމެދު ހޭދަކުރާ ވަގުތުތައް އެއް މިނެއްގައި ހިފަހައްޓަން ނިންމާފައިވާ ކަމަށެވެ. އެގޮތަށް ނިންމީ، މިސްކިތްތަކާ ބެހޭ ގައުމީ މަޖިލީހުގެ ލަފާގެ މަތިންނެވެ.

އެކި މިސްކިތްތަކުގައި މިހާރު ބަންގި އާއި ގަމަތާ ދެމެދު ހޭދަކުރާ ވަގުތުތައް ތަފާތެވެ. އެކި ރަށްރަށުގައި ވެސް އަމަލު ކުރަމުންދަނީ އެކި ވަގުތަށެވެ.

މިނިސްޓްރީން ކަނޑައަޅާފައި ވަނީ ފަތިސް ނަމާދުގައި ބަންގި އާއި ގަމަތާއި ދެމެދު 15 މިނެޓު، މެންދުރު ނަމާދާއި އަސްރު ނަމާދުގައި 12 މިނެޓު، މަޣްރިބް ނަމާދުގައި އަށް މިނެޓު އަދި އިޝާ ނަމާދުގައި 10 މިނެޓު ހޭދަކުރުމަށެވެ.

މި ނިންމުމަކީ ބަންގި އާއި ގަމަތާ ދެމެދު މިހާރު ސުންނަތް ނަމާދު ކުރުމަށް ލިބޭ ވަގުތު ކުޑަވުމުގެ ސަބަބުން އާއްމުންގެ ޝަކުވާ މިނިސްޓްރީއަށް ލިބުމާ ގުޅިގެން ގެނައި ބަދަލެއް ކަމަށް ވެސް މިނިސްޓްރީން ބުންޏެވެ.