ކާބޯތަކެތީގެ ރައްކާތެރިކަން ކަށަވަރުކުރުމަށް ރާއްޖޭގެ ރަށްތަކުގައި އަނބު ދަނޑު ހެއްދުމުގެ ޕްރޮގްރާމެއް މިނިސްޓްރީ އޮފް ފިޝަރީޒް މެރިން ރިސޯސް އެންޑް އެގްރިކަލްޗަރއިން ފަށައިފިއެވެ. މިގޮތުން އަނބު ދަނޑު ހެެއްދުމަށް، އެންމެ ފުރަތަމަ އަނބުގަސް އިންދާފައިވަނީ ހއ. އުތީމުގައެވެ.

އުތީމުގައިގައި ބޭއްވި ރަސްމިއްޔާތު ޝަރަފުވެރިކޮށްދެއްވާ، މި ޕްރޮގްރާމް ފައްޓަވައިދެއްވީ މިނިސްޓަރ އޮފް ފިޝަރީޒް މެރިން ރިސޯސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަންއެވެ. 40 އަނބުގަހުގެ އަނބު ދަނޑެއް އުތީމުގައި ވަނީ އިންދާފައެވެ.

މި ޕްރޮގްރާމް ފައްޓަވައިދެއްވާ ވާހަކަދައްކަވަމުން މިނިސްޓަރ ޑރ. ޙުސައިން ރަޝީދު ޙަސަން ވިދާޅުވީ، މި އަނބުގަސްތަކަކީ ބަނގްލަދޭޝްއިން ގެނެސްފައިވާ މުޑުވަށްތަކެއްކަމަށެވެ. މިނިސްޓަރ ވިދާޅުވީ، ރާއްޖޭގައި އާއްމުކޮށް ހައްދާ އަނބު ގަހަކީ ހައްދަން އުނދަގޫ ގަހެއްކަމަށެވެ. ނަމަވެސް އަލަށް ތަޢާރަފުކުރި ބަންގްލަދޭޝްގެ މި މުޑުވަކަކީ ހައްދަން ފަސޭހަ، މީރު އަނބެއްކަން މިނިސްޓަރ ފާހަގަކުރެއްވިއެވެ.

މި މުޑުވަށް 3-4 އަހަރުގެ ތެރޭގައި ރަނގަޅަށް ފޯދި، މޭވާ ލިބޭނެކަމަށް މިނިސްޓްރީން ވިދާޅުވެއެވެ. އަންނަ އޮކްޓޯބަރު މަހު ރާއްޖެއަށް އިތުރު ގަސްތައް ލިބި، ގިނަ ރަށްތަކެއްގައި އަނބު ދަނޑު އިންދުމުގެ މަސައްކަތް ފަށާނެކަމަށް މިނިސްޓަރީއިން ވިދާޅުވެއެވެ.

ސަރުކާރުން ވަނީ ރާއްޖޭގައި ކުރުނބާ އަދި ކާށި ލިބުން ދަތިވުމާއިއެކު ރުއް އާލާކުރުމުގެ ޤައުމީ ޕްރޮގްރާމެއްވެސް ފައްޓަވާފައެވެ. މިހާތަނަށް 4000 އަށްވުރެ ގިނަ ރުއް ވަނީ ރާއްޖޭގެ އެކި ރަށްރަށުގައި އިންދާފައެވެ.