ހުޅުމާލެ ގޮނޑުދޮށުން ފަތުރުވެރިންނަށް ޚާއްޞަ ސަރަހައްދެއް ކަނޑައަޅައި އެތަން ތަރައްޤީކުރުމުގެ އެއްބަސްވުމުގައި މިއަދު ސޮއެކޮށްފިއެވެ.

އާބަންކޯ އާއި ޓުއަރިޒަމް މިނިސްޓްރީ އާއި ދެމެދު ވެވުނު މިއެއްބަސްވުމުގައި، އާބަންކޯގެ ފަރާތުން ސޮއެކުރެއްވީ، އެކުންފުނީގެ މެނޭޖިން ޑައިރެކްޓަރު އަހްމަދު އާތިފް އެވެ. އަދި ޓޫރިޒަމް މިނިސްޓްރީގެ ފަރާތުން އެއްބަސްވުމުގައި ސޮއެކުރެއްވީ، އެ މިނިސްޓްރީގެ ޕާމަނަންޓް ސެކެޓްރީ ފާތިމަތު ނިލްފާ އެެވެ.

އާބަންކޯއިން ހާމަކޮށްފައިވާ ގޮތުގައި މިއެއްބަސްވުމުގެ ދަށުން، ހުޅުމާލޭގެ އިރުމަތި ފަރާތު ގޮނޑުދޮށުން ބައެއްގައި ފަތުރުވެރިންނަށް ޚާއްސަ ޕްރައިވެޓް ބީޗެއް ތަރައްޤީކުރުމަށް ވަނީ ހަމަޖެހިފައެވެ. މިގޮތުން ތަރައްޤީކުރުމަށް ކަނޑައަޅާފައި ވަނީ، މަސައްކަތް ހުއްޓިފައި އޮތް، ވޯޓާ ތީމްޕާކާއި ދިމާއިން އިރުމަތިފަރާތު ބީޗެވެ. އެސަރަހައްދަކީ މިހާރުވެސް އާއްމުކޮށް މީހުން ގޮސް އުޅޭ ސަރަހައްދެއް ނޫނެވެ.

ހުޅުމާލެ ފޭސް 1 އާއި ފޭސް 2ގެ އިރުމަތި ފަރާތު ބީޗަކީ ހުޅުމާލޭގައި ދިރިއުޅޭ ފަރާތްތަކާއި ހުޅުމާލެއަށް ޒިޔާރަތްކުރާ ފަރާތްތަކުގެ ހިތްހަމަ ޖެހުމަށް ބޭނުންކުރާ ބީޗެކެވެ. 

ފަތުރުވެރިންނަށް ޚާއްސަ ބީޗެއް ހުޅުމާލޭގައި ތަރައްޤީކުރެވިގެން ދިޔުމަކީ އެކަމުގެ ސަބަބުން ހުޅުމާލޭގައި ފުޅާވަމުން އަންނަ ގެސްޓްހައުސްގެ ވިޔަފާރިއަށް އިތުރު ފުރުޞަތުތަކެއް ލިބިގެންދާނެ ކަމެއް ކަމުގައި ޓޫރިޒަމް މިނިސްޓްރީން ވަނީ ފާހަގަކޮށްފައެވެ.