2018 ވަނަ އަހަރުގެ ރިޔާސީ އިންތިޚާބާއި ދިމާކޮށް، "ހިޔާ އެކޮމްޕްލިޝްޑް" ޕްރޮގްރާމްގެ ނަމުގައި، ފްލެޓާއި ގޯތި ލިބޭނެ ކަމަށް ބުނެ ރައީސް ޔާމީނުގެ ސަރުކާރުން ރައްޔިތުންނަށް ދޫކުރި ލިޔުންތަކާއި ގުޅޭ މައުލޫމާތު ހައުސިންގ މިނިސްޓްރީއަށް ހުށައެޅުމަށް އެމިނިސްޓްރީން އެދިއްޖެއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މިއަދު ކުރި އާއްމު އިޢުލާނެއްގައި ބުނެފައި ވަނީ، ރައީސް ޔާމީނުގެ ސަރުކާރުގެ މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރއިން ގޯއްޗާއި ފުލެޓު ލިބޭނެކަމަށް ބުނެ ދޫކޮށްފައިވާ އެފަދަ ލިޔުންތައް އެކިފަރާތްތަކުން މި މިނިސްޓްރީއަށް ހުށަހަޅަމުން ގެންދާކަމަށެވެ. އަދި ސަރުކާރު ބަދަލުވި އިރު އެއާގުޅޭ ލިޔެކިޔުންތައް އެމިނިސްޓްރީގައި ފެންނަން ނެތްކަމުގައިވެސް ހައުސިންގ މިނިސްޓްރީން ވަނީ ބުނެފައެވެ. އެހެންވެ އެކަން ހިނގާފައިވާގޮތް ބެލުމަށާއި އަދި ލިޔުން ޙަވާލުކޮށްފައިވާ މީހުންގެ އަދަދު ދެނެގަނެ އެ މައްސަލައަށް ޙައްލުހޯދައިދެވޭނެ ގޮތެއް ބެލުމަށް ބޭނުންވާތީ، އެފަދަ ލިޔުންތައް ލިބިލައްވާފައިވާ އެހެން ފަރާތްތަކުންވެސް އެލިޔުންތަކާއި، ލިޔުންތަކާއި ގުޅޭ މައުލޫމާތު މިނިސްޓްރީއަށް ހުށައެޅުއްވުމަށް އެދޭކަމުގައި ހައުސިންގ މިނިސްޓްރީ ވަނީ ބުނެފައެވެ.

މިގޮތުން ކުރީ ސަރުކާރުގައި، ފުށިދިއްގަރުފަޅާއި ހުޅުމާލެއިން ފްލެޓް ލިބޭނެކަމަށް ދޫކޮށްފައިވާ ލިޔުންތައް، 15 ސެޕްޓެމްބަރު 2023 ވަނަ ދުވަހުގެ ނިޔަލަށް ހައުސިންގ މިނިސްޓްރީއަށް ހުށައެޅުއްވުމަށް އެމިނިސްޓްރީން ވަނީ އެދިފައެވެ. އަދި ލިޔުން ހުށަހަޅުއްވާއިރު ލިޔުމާއި ޙަވާލުވިތަނާއި ތާރީޚް އެނގޭނެ ގޮތަށް ސިޓީއަކާއެކު މިނިސްޓްރީއަށް ހުށައެޅުމަށްވެސް ހައުސިންގ މިނިސްޓްރީން ވަނީ އެދިފައެވެ.

"ހިޔާ އެކޮމްޕްލިޝްޑް" ޕްރޮގްރާމް، ރައީސް ޔާމީނުގެ ސަރުކާރުން އިޢުލާނުކުރީ 01 އޮގަސްޓް 2018 ގައެވެ. އެޕްރޮގްރާމްގެ ދަށުން، ބިންހިއްކުމުގެ އެއްވެސް މަސައްކަތެއް ކޮށްފައި ނެތް، އަދި ޕްލޭނެއްވެސް ހަދާފައިނެތް، ކ. ފުށިދިއްގަރުފަޅުން 1000 އަކަފޫޓުގެ ގޯތި ލިބިފައިވާ ކަމަށް، އެތައްހާސް ބަޔަކަށް ލިޔުންތައް ދޫކޮށްފައިވެއެވެ. ރިޔާސީ އިންތިޚާބުގައި ރައީސް ޔާމީނާއި ނާކާމިޔާާބާއި ކުރިމަތިލައްވަން ޖެހިވަޑައިގެންނެވި ނަމަވެސް، 17 ނޮވެމްބަރު 2018 ވަނަ ދުވަހުގެ ހެނދުނު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެރިކަމުގެ ހުވާކުރެއްވުމުގެ ވަގުތާއި ހަމައަށް، އޭރު ހައުސިންގ މިނިސްޓަރުގެ މަޤާމުގައި ހުންނަވައި، ޑރ. މުހައްމަދު މުޢިއްޒު އެތައްހާސް ބަޔަކަށް ލިޔުންތައް ދޫކުރެއްވިއެވެ.