ލޯކަލް ކައުންސިލްތަކަށްދޭ މާލީ އެހީ އިތުރު ކޮށްދެއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު މިިއަދު ވިދާޅުވެއްޖެ އެވެ. ރައީސް މިހެން ވިދާޅުވީ ކެންޕެއިން ދަތުރުފުޅެއްގައި މިއަދު ރ. ކިނޮޅަހަށް ވަޑައިގެން ވާހަކަފުޅު ދައްކަވަމުންނެވެ. 

ރައީސް ވިދާޅުވީ، ކޮންމެ ކަމެއްގައި ގޮތް ނިންމަން ރައީސް އޮފީހަށް ސިޓީ ފޮނުވަން ވެއްޖެ ނަމަ ފަސް އަހަރުގެ ތެރޭގައި ކުރަން ހުރި ކަންތައްތަކެއް ނުކުރެވި، ހެޔޮ ވެރިކަމެއް ނުކުރެވޭނެކަމަށެވެ. 

ބައެއް ފަހަރު ބާރުތައް ދޫކޮށްގެން މަސައްކަތް ކުރަން އުނދަގޫވިޔަސް، ޖުމްލަކޮށް ރާއްޖެ އަށް ގެންނަ ތަރައްގީގައި އެންމެ މުހިއްމު ދައުރެއް އަދާކުރަނީ ލާމަރުކަޒީކޮށް، ބާރުތައް ދޫކުރުމުން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ.

"ބަޖެޓު ވެސް ދޫކޮށްލަންވީ ކައުންސިލްތަކަށް. ކުރިއަށް އޮތް ދައުރުގައި ހެޔޮވެރިކަމުގެ ސިޔާސަތުގައި ކައުންސިލްތައް ބާރުވެރިކުރުވައި ފައިސާ، ބަޖެޓު މިހާރަށް ވުރެ ބޮޑުކުރާނެ،" ރައީސް ވިދާޅުވި އެވެ.

އެމްޑީޕީގެ މެނިފެސްޓޯގައި ވަނީ ސިޓީއާއި ރަށްތަކުގެ ތަރައްގީގެ ކަންކަން ކުރިއަށް ގެންދިއުމާއި ކައުންސިލްތަކުގެ މާލީ ފުދުންތެރިކަން އިތުރުކުރުމަށް ކުރާ މަސައްކަތްތަކަށް އެހީތެރިވުމަށް ކައުންސިލްތަކުން މާލީ އިދާރާތަކާ ގުޅިގެން ލޯނު ނެގުމުގެ ފަސޭހަ އިންތިޒާމުތަކެއް ހަމަޖައްސާނެ ކަމަށެވެ. މީގެކުރިން ބާރުތައް ބަނދެވިފައި އޮތް ކައުންސިލްތަކަށް މި ސަރުކާރުން ބޮޑެތި ބާރުތަކެއްދީ ވަނީ ކައުންސިލްތައް އަމިއްލަ ފައިމައްޗަށް ތެދުވުމަށް މަގުފަހިކޮށްދީފައެވެ. މިކަމަށް ކައުންސިލްތަކުން ސަރުކާރަށް ޝުކުރުވެސް އަދާކުރެއެވެ.