މިއަހަރުގެ ރިޔާސީ އިންތިހާބުގައި ޕީޕީއެމް-ޕީއެންސީގެ ފަރާތުން ވާދަކުރައްވާ ރިޔާސީ ކެނޑިޑޭޓް ޑރ. މުހައްމަދު މުއިއްޒު ވަނީ އާދީއްތަ ދުވަހުގެރޭ އެބޭފުޅާގެ ހާރިޖީ ސިޔާސަތު ހާމަކުރައްވާފައެވެ. މި ސިޔާސަތު ހާމަކުރައްވާފައިވަނީ ހުޅުމާލެ ފޭސް2 ގައި ބޭއްވި ޖަލްސާއެއްގައެވެ.

މި ޖަލްސާގައި ޑރ. މުއިއްޒު ވަނީ ރައީސް އިބްރާހިމް މުހައްމަދު ސާލިހްގެ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ޑރ. މުއިއްޒު ވިދާޅުވީ، މި ސަރުކާރުގައި ދިވެހިން އަމިއްލައަށް ދިވެހިންގެ ކަންކަން ނިންމުގެ ބާރެއް ނެތް ކަމަށާއި، ރާއްޖެ އޮތީ އެހެން ގައުމަކަށް އަޅުވެތިވެފައިކަމަށެވެ. 

'ދިވެހީންގެ ރާއްޖެ'ގެ ނަމުގައި ކުރީގެ ރައީސް އަބްދުﷲ ޔާމީންގެ ތާއީދާ އެކު ރިޔާސީ ރޭހަށް ނުކުމެވަޑައިގެން ހުންނެވި ޑރ. މުއިއްޒު ވިދާޅުވީ، ޔާމީން އެ ޝިއާރު މި އިންތިހާބަށް ކަނޑައެޅުއްވީ ރާއްޖޭގެ މިނިވަންކަން ގޮސްފައި އޮތް ހިސާބުން ކަމަށެވެ. އަދި 'ދިވެހީންގެ ރާއްޖެ ދިވެހީންނަށް' ހޯދައިދޭން މި ޖެހެނީ، މި ސަރުކާރުން އެއް ގައުމަކަށް ބަރޯސާވެ ހުސްވެފައިވާ ސިޔާސަތެއް ގެންގުޅޭތީ ކަމަށް ޑރ. މުއިއްޒު ވިދާޅުވި އެވެ. ޑރ. މުއިއްޒު މި ވިދާޅުވާ ރާއްޖޭގެ މިނިވަންކަން ގެއްލުމަކީ ކޮބައިބާއެވެ؟

ޑރ. މުއިއްޒު މިހެން ވިދާޅުވެފައިވާއިރު ކުރީގެ ރައީސް އަބްދުﷲ ޔާމީންގެ ސަރުކާރުގައި ވަނީ އަވަށްޓެރި ގިނަ ޤައުމުތައް ހިމެނޭހެން، ޤައުމުތަކަކާއި އަދި ބައިނަލްއަޤްވާމީ ޖަމާއަތްތަކާއި އޮތް ގުޅުން ކަނޑާލާ ހަމައެކަނި ޗައިނާއަށް ބަރޯސާވެފައެވެ. އެގޮތުން ޤަތަރު، އިންޑިއާ، އަދި ކޮމަންވެލްތް ފަދަ ރާއްޖެއިން މީގެކުރިން ވަރުގަދަ ގުޅުމެއް ބާއްވަމުން އައި އެތަކެއް ތަނަކާއި ވަނީ ގުޅުން ކަނޑާލާފައެވެ. މީގެ ސަބަބުން ރާއްޖެއަށް އިޤްތިސާދީގޮތުންނާއި އިޖްތިމާއިގޮތުންވެސް އޭރު އެތަކެއް ދަތިތަކަކާއި ކުރިމަތިލާން ޖެހުނެވެ. އެގޮތުން ފާހަގަކޮށްލެވޭ އެއްކަމަކީ، ރާއްޖެއާއި ޤަތަރާއި އޮތް ސިޔާސީ ގުޅުން ކަނޑާލުމުން، ޤަތަރު އެއަރވޭސް ރާއްޖެއަށް އައުން ހުއްޓާލުމެވެ. ޤަތަރުގެ ދޯހާއަކީ ޔޫރަޕުން ރާއްޖެއަށް އަންނަ ގިނަ އަދަދެއްގެ ފަތުރުވެރިން ބޭނުންކުރާ މައި އެއް ޓްރާންސިޓް ހަބު ކަމަށްވުމުން، ދެ ގައުމުގެ ގުޅުމަށް މިއައި ހީނަރުކަމާއެކީ ރާއްޖޭގެ ފަތުރުވެރިކަމުގެ ސިނާއަތަށް އެކަމުގެ ނޭދެވޭ އަސަރުކުރިއެވެ.

ނަމަވެސް ރައީސް އިބްރާހިމް މުހައްމަދު ސާލިހްގެ ސަރުކާރުން ވަނީ މިގޮތަށް ހީނަރުވެފައިވާ އެތަކެއް ގުޅުންތަކެއް އަލުން އަނބުރާ އިއާދަކޮށްފައެވެ. ރާއްޖޭގެއަކީ ކުޑަ ގައުމަކަށް ވުމަކީ އަވަށްޓެރި އެހެން ޤައުމުތަކާއި ބީރަށްޓެހިވެގެން އުޅެވޭނެ ސަބަބެއް ނޫންކަން ރައީސް އިބޫއަށް ވިސްނުނެވެ. 

ކޮމަންވެލްތާއި އަލުން ގުޅުމަށް ރަސްމީކޮށް ދިވެހި ސަރުކާރުން މަސައްކަތް ފެށީ 2018 ވަނަ އަހަރުގެ ޑިސެމްބަރު މަހުގައެވެ. އެއީ ރައީސް އިބްރާހީމް މުޙައްމަދު ޞާލިޙުގެ ރިޔާސީ ވައުދުތަކުގެ ތެރެއިން ފުރަތަމަ 100 ދުވަހުގެ ތެރޭގައި ފުރިހަމަކުރައްވަން ނިންމެވި މުހިއްމުކަމެކެވެ. މި ނިންމުމާއެކު ފުރިހަމަކުރައްވަން ދިވެހި ސަރުކާރަށް ޖެހިވަޑައިގަތް ހުރިހާކަމެއް ފުރިހަމަކުރެއްވުމަށްފަހު އަލުން  އެޖަމާއަތުގެ މެމްބަރު ޤައުމަކަށް ރާއްޖެވެގެންދިޔައީ 2020 ވަނަ އަހަރުގެ ފެބްރުއަރީ މަހުގެ ފުރަތަމަ ދުވަހުގައެވެ. 

ކޮމަންވެލްތަކީ އިނގިރޭސި ރަސްކަމުގެ ނިޒާމުގެ ދަށުން މެމްބަރު ޤައުމުތަކުގައި ޑިމޮކްރަސީގެ އަސާސްތައް ޤާއިމުކުރުމަށް ބާރުއެޅުމާއި ހަމަޖެހުމާއި އަމާންކަން ކަށަވަރުކުރުމަށް ބާރުއަޅާ ޖަމާއަތެކެވެ. ދުނިޔޭގެ 56 ޤައުމަކުން 2.5 ބިލިއަނަށްވުރެ ގިނަ މީހުންނަކީ  ކޮމަންވެލްތުގެ ރައްޔިތުންނެވެ. ކޮމަންވެލްތުގެ މެންބަރު ގައުމަކަށް އަލުން ރާއްޖެ ވުމަކީ އިޤްތިސާދީގޮތުންނާއި އަދި އެނޫންވެސް ގޮތްގޮތުން ރާއްޖެއަށް ގިނަގުނަ ފައިދާތަކެއް ލިބިގެންދިޔަ ކަމެކެވެ. 

ރާއްޖެއިން ކޮމަންވެލްތުގެ ޤައުމަކަށް ވުމާއެކު ރާއްޖެއިން ކޮމަންވެލްތުގެ މެމްބަރު ޤައުމުތަކުގައި ޤާއިމުކޮށްފައިވާ އެމްބަސީތައްވަނީ ހައިކޮމިޝަންތަކަށް ބަދަލުވެފައެވެ. މިއާއެކު ކޮމަންވެލްތު ޤައުމުތަކުގެ އެހީތެރިކަން ރާއްޖެއަށް ލިބުމުގެ މަގު ފަހިވެގެންދެއެވެ. އަދި މެމްބަރު  ޤައުމުތަކަށް ދަތުރުފަތުރުކުރުމާއި ވިޔަފާރީގެ ގުޅުން ފުޅާކުރުމުގައިވެސް ކޮމަންވެލްތުން މުހިއްމު ދައުރެއް އަދާކުރެއެވެ. 

އެހެންކަމުން ޑރ. މުއިއްޒުގެ ހާރިޖީ ސިޔާސަތާމެދު ހިތުގައި ޝައްކު އެުފެދޭ ނޫންތޯއެވެ؟ ޑރ. މުއިއްޒު މިއަހަރުގެ ރިޔާސީ އިންތިހާބަށް ނިކުމެފައިވަނީ ކުރީގެ ރައީސް ޔާމީންގެ ފަހަތްފުޅުންކަމަށް ބުނާއިރު، ޑރ. މުއިއްޒުއަށް ވެރިކަން ލިބިއްޖެނަމަ އަނެއްކާވެސް ބޭރު ދުނިޔެއާއި ރާއްޖެއާއި ދެމެދު ބަދަހިވެފައި މިއޮތް ގުޅުންތައް ހީނަރުވެދާނެއެކޭ ހިތަކަށް ނާރާހެއްޔެވެ؟