ހުޅުމާލެ ފަޅުން 62.6 ހެކްޓަރުގެ ބިން ހިއްކުމަށް ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑް (ސީއެމްސީ)އާއި ހަވާލުކޮށްފިއެވެ. އެ ކުންފުންޏާއި ބިން ހިއްކުމުގެ މަސައްކަތް ހަވާލުކޮށްފައިވަނީ އާރބަންކޯއިންނެވެ.

ހުޅުމާލެއިން ހިއްކާ މިބިމަކީ ބިންވެރިޔާ ސްކީމްގެ ދަށުން މާލޭގެ ރައްޔިތުންނަށް ގޯތި ދޫކުރުމަށް ހިއްކާ ބިމެއްކަމަށް އާރބަންކޯއިން ބުނެއެވެ.

އެގޮތުން ހައުސިން މިނިސްޓްރީން އާއްމުކޮށްފައިވާ ލިސްޓަށް ބަލާއިރު، 1351 ގޯތި ހުޅުމާލެއިން ދޫކުރާނެއެވެ. މީގެތެރޭގައި 8 ސައިޒެއްގެ ގޯތި ހިމެނެއެވެ. މީގެއިތުރުން އެ ސަރަޙައްދުގައި އާބާދުވާ މީހުންނަށް ބޭނުންވާ އާއްމު ޚިދުމަތްތައް ޤާއިމުކުރުމަށް ބިން ކަނޑައަޅާނެއެވެ. ހުޅުމާލެއިން ބިން ހިއްކަނީ، ފަރުކޮޅުފުށި ކުރިމަތިން އޮތް ފަޅުގެ ސަރަޙައްދެވެ.

ހުޅުމާލޭގެ އިތުރުން ސީ.އެމް.ސީ ކުންފުންޏާވަނީ، އިތުރު 2 ސަރަޙައްދެއް ހިއްކުމަށް ހަވާލުކޮށްފައެވެ. އެއީ ދިޔަނެރު ފަޅުން 24.6 ހެކްޓަރ އަދި ތިލަފުށި އޭރިއާ.ޑީ އިން 9.6 ހެކްޓަރ ހިއްކުމަށެވެ.މި މަޝްރޫޢުތަކުގައި ގެދޮރުވެރިކަމުގެ ބޭނުންތަކާއި، އިންޑްސްޓްރިއަލް ބޭނުންތަކާއި، މެރީނާގެ ބޭނުންތައް ބިން ބޭނުންކުރާނެ ކަމަށް އާރބަންކޯއިން ބުނެއެވެ.