ރިޔާސީ އިންތިހާބު 2023 ގައި، ރާއްޖޭން ބޭރުގައި ވޯޓުފޮށި ބަހައްޓާ 5 ގައުމުގައި، އެ ގައުމެއްގެ ގަޑިން ވޯޓުލުން ފަށާގަޑި އާއި، ވޯޓުލުން ނިންމާ ގަޑިތައް އީސީ އިން ޢާންމުކޮށްފިއެވެ.

ރާއްޖެއިން ބޭރުގެ ފަސް ޤައުމެއްގައި ވޯޓުފޮށިތައް ބަހައްޓާއިރު، އެޤައުމުތަކާއި ރާއްޖޭގެ ގަޑިއާ ބޮޑު ފަރަޤެއް ހުރެއެވެ. މިގޮތުން އެންމެ ބޮޑު ފަރަޤެއް ހުންނާނީ ރާއްޖެއާ އިނގިރޭސި ވިލާތާއި ދެމެދުގައެވެ. މިގޮތުން އިނގިރޭސި ވިލާތުގެ ގަޑި ރާއްޖޭގެ ގަޑިއަށްވުރެ 4 ގަޑިއިރު ލަސްވާނެއެވެ. ޓްރެވިންޑްރަމްއާ ކޮލަމްބޯގެ ގަޑި ރާއްޖޭގެ ގަޑިއަށްވުރެ 30 މިނިޓް އަވަސްވާނެއެވެ. އަބޫދާބީގެ ގަޑި ރާއްޖޭގެ ގަޑިއަށްވުރެ އެއްގަޑިއިރު ލަސްވާނެއެވެ. ކުއާލަލަމްޕޫރުގެ ގަޑި ރާއްޖޭގެ ގަޑިއަށްވުރެ 2 ގަޑިއިރު އަވަސް ވާނެއެވެ.

އިލެކްޝަންސް ކޮމިޝަނުން ހާމަކޮށްފައިވާ ގޮތުގައި، ޓްރެވިންޑްރަމްއާ ކޮލަމްބޯ އަދި ލަންޑަނުގައި ވޯޓުލާން ފަށާނީ އެގައުމުތަކުގެ ގަޑިން ހެނދުނު 8:30 ގައެވެ. އަދި ވޯޓުލުން ނިންމާނީ 16:30 ގައެވެ. އަބޫދާބީގައި ވޯޓުލުން ފަށާނީ، ހެނދުނު، 9:00 ގައެވެ. ވޯޓުލުން ނިންމާނީ، 17:00 ގައެވެ. ކުއާލަލަމްޕޫރުގައި ވޯޓުލާން ފަށާނީ، މެލޭޝިއާ ގަޑިން ހެނދުނު 11:00ގައެވެ. އަދި ވޯޓުލުން ނިމޭނީ، އިރުއޮއްސި 19:00 ގައެވެ.

ލަންޑަން ފިޔަވައި އެހެން ހުރިހާ ސިޓީއެއްގައިވެސް ވޯޓުލާގަޑިއާއި ވޯޓުލުން ނިންމާގަޑި ރާއްޖެއާ އެއްވަގުތަކަށް ދިމާވާނެއެވެ. އެހެން ނަމަވެސް ލަންޑަނުގައި ވޯޓުލުން ފެށޭނީވެސް ރާއްޖޭގަޑިން، މެންދުރު 12:30 ގައެވެ. އަދި ލަންޑަނުގައި ވޯޓުލުން ނިމޭނީ ރާއްޖޭގަޑިން ރޭގަނޑު 8:00 ޖަހާއިރުގައެވެ. ލަންޑަނުގައި ވޯޓުލުން ނިމޭނީ، ރާއްޖެއާ އެހެން ޤައުމުތަކުގައި ވޯޓުގެ ނަތީޖާ އިޢުލާން ކުރަންފަށާފަހުންނެވެ.