Advertisement
ރިޔާސީ އިންތިޚާބުގެ އޮފިޝަލުން ތަމްރީން ކުރުމުގެ ތެރެއިން ---
ރިޔާސީ އިންތިޚާބުގެ އޮފިޝަލުންގެ ތަމްރީން ޕްރޮގްރާމް ފަށައިފި
ރިޔާސީ އިންތިޚާބުގައި އޮފިޝަލުންގެ ގޮތުގައި މަސައްކަތްކަތް ކުރާ ފަރާތްތަކަށް ތަމްރީން ދިނުމުގެ ޕްރޮގްރާމް އާދީއްތަ ދުވަހު ފަށައިފިއެވެ.
އިލެކްޝަންސް ކޮމިޝަންގެ ނައިބުރައީސް އިސްމާޢީލް ޙަބީބު ވިދާޅުވީ، މާލޭސިޓީ ފިޔަވައި، އެހެން ސިޓީތަކާއި، ހުރިހާ އަތޮޅެއްގެ، ވޯޓުލާ މަރުކަޒުތަކުގައި މަސައްކަތް ކުރައްވާ އޮފިޝަލުން ތަމްރީން ކުރުމުގެ މަސައްކަތް އާދީއްތަ ދުވަހު ފަށާފައިވާކަމަށެވެ.
ޙަބީބު ވިދާޅުވީ، ވޯޓުލާ މަރުކަޒުތަކުގައި މަސައްކަތް ކުރައްވާ އޮފިޝަލުންނަކީ، އިލެކްޝަންސް ކޮމިޝަންގެ އިގްރާރުގައި ސޮއިކުރެއްވުމަށްފަހު، އެއްވެސް ސިޔާސީ ޕާޓީއެއްގެ ސިޔާސީ ޙަރަކާތްތެއްގައި، އަދި އެއްވެސް ކެންޑިޑޭޓެއްގެ ކެމްޕޭން ޙަރަކާތެއްގައި އުޅުއްވޭނޭ ބޭފުޅުންނެެއްނޫންކަމަށެވެ. އަދި ސޯޝަލް މީޑިއާގެ އެއްވެސް ވަސީލަތެއް މެދުވެރިކޮށް ވަކި ކެންޑިޑޭޓަކަށް ތާއީދު ކުރުމުގެ ގޮތުން ނުވަތަ ތާއީދު ނުކުރުމުގެ ގޮތުން ވެސް ޚިޔާލެއް ފާޅު ކުރުމަކީ އޮފިޝަލުންގެ ސުލޫކީ މިންގަނޑާ ހިލާފުވާނޭ ކަމެއްކަމުގައި ވުމުން، ވޯޓުލާ މަރުކަޒުތަކުގެ އޮފިޝަލުން، ސުލޫކީ މިންގަނޑު ދެމެހެއްޓެވުން އެދޭކަމުގައި ޙަބީބު ވިދާޅުވިއެވެ.
ޙަބީބު ވިދާޅުވީ، ސިޓީ، އަތޮޅު އަދި ރަށު ކައުންސިލްތަކުގެ ފޯކަލް ޕޮއިންޓުން މިކަންކަން ކަށަވަރުކުރެއްވުން އިލެކްޝަންސް ކޮމިޝަނުން އެދޭކަމަށާއި، އަދި ޓްރޭނަރުންވެސް މިކަމަށް ސަމާލުކަން ދެއްވުން އެދިވަޑައިގަންނަވާ ކަމަށެވެ.
މިއަހަރުގެ ރިޔާސީ އިންތިޚާބު ބޭއްވުމަށް ހަމަޖެހިފައި ވަނީ، 9 ސެޕްޓެމްބަރު 2023ވާ ހޮނިހިރު ދުވަހުގައެވެ.
