ދުނިޔޭގެ ފުޓްބޯޅަ "އައިކޮން" ލިއޮނެލް މެސީ އެމެރިކާގެ އިންޓަމިއާމީއަށް ކުޅެންފެށިފަހުން ހަތް ވަނަ މެޗުގައި މުޅިން އަލަށް އެ ޓީމަށް ޓްރޮފީއެއް ހޯދައި ދިނުމުގައި މުހިންމު ދައުރެއް އަދާކޮށްފިއެވެ. އަދި މި ޓްރޮފީއާއިއެކު މެސީއަށް ވެސް މިވަނީ ކާމިޔާބީގެ އިތުރު ހަރުފަތަކަށް ދަތުރު ކުރެވިފައެވެ.

އެމެރިކާ އަދި މެކްސިކޯގެ ޓީމުތަކުގެ މެދުގައި ކުޅޭ ލީގު ކަޕްގެ މި އަހަރުގެ މުބާރާތުގެ ފައިނަލުގައި ހޮނިހިރު ދުވަހުގެރޭ ބައްދަލުކުރީ އެމެރިކާގެ ދެ ކްލަބް ކަމުގައިވާ އިންޓަމިއާމީ އާއި ނެޝްވިލް ސްޕޯޓްސް ކްލަބެވެ. މި މެޗުގެ ފުރިހަމަ ވަގުތު ހަމަވިއިރު 1-1 އިން މެޗު އެއްވަރުވެފައި ވުމުން، މެޗުގެ ނަތީޖާ ނެރުނީ ޕެނަލްޓީ ޖަހައިގެންނެވެ.

ފައިނަލް މެޗުގައި ފުރަތަމަ ގޯލެއް ކާމިޔާބުކޮށް ލީޑު ނެގީ މިއާމީ އިންނެވެ. އެއީ މެޗުގެ 23 ވަނަ މިނެޓުގައި މެސީ ޖެހި މޮޅު ގޯލަކުންނެވެ. ނެސްވިލް އިން މެޗު ހަމަހަމަކުރީ ދެ ވަނަ ހާފުގައެވެ. އެއީ މެޗުގެ 57 ވަނަ މިނެޓުގައި އެ ޓީމުގެ ފަފާ ޕިކޯލްޓް ކާމިޔާބުކުރި ގޯލަކުންނެވެ.

ޕެނަލްޓީ ޖަހައިގެން ވެސް މެޗުގެ ނަތީޖާ ނެރުން ވީ ބޮޑު އަރަތަކަށެވެ. ކޮންމެ ޓީމަކުން 11 ޕެނަލްޓީ ޖަހަންޖެހުނު އިރު، މެޗުން މޮޅުވި ޓީމު ކަނޑައެޅުނީ ދެ ޓީމުގެ ކީޕަރުންނާއި ހިސާބުންނެވެ. އެއީ ނެޝްވިލް ގެ ކީޕަރ އެލިއެޓް ޕެނިކޯ ފޮނުވާލި ޕެނަލްޓީ މިއާމީގެ ޑްރެކް ކެލަންޑަރ މަތަކުރި ހިސާބުންނެވެ.

މި ތައްޓާއެކު މެސީ ވެގެން ގޮސްފައި މިވަނީ ދުނިޔޭގައި ހުރި އެންމެ ކާމިޔާބު ފުޓުބޯޅަ ކުޅުންތެރިޔާއަށެވެ. މީގެ ކުރިން މި ޝަރަފު ޙިއްސާކުރީ މެސީއާއި އޭނާއާއި އެކު ބާސެލޯނާގައި ކުޅުނު ޑެނީ އަލްވޭސް އެވެ. އެއީ މި މެޗުގެ ކުރިން ދެ ކުޅުންތެރިންވެސް 43 ތަށި ކާމިޔާބު ކޮށްފައިވުމުންނެވެ. މެސީ އޭނާގެ ކެރިއަރ 2004 ގައި ފެށިފަހުން މިހާރު މިވަނީ 44 ތަށި ކާމިޔާބު ކޮށްފައެވެ. އޭގެ ތެރޭގައި 10 ލަލީގާއާއި، 4 ޗެމްޕިއަންސް ލީގާއި، 7 ކޕަ ޑެލް ރޭ އާއި، 8 ސްޕެނިޝް ސުޕަ ކަޕާއި، 3 ފީފާ ކްލަބް ވާލްޑް ކަޕާއި، 3 ޔޫއެފާ ސުޕަ ކަޕާއި، އެއް ވާލްޑް ކަޕް ހިމެނެއެވެ.

ހޮނިހިރު ދުވަހުގެ ފައިނަލް މެޗުން ފާހަގަވި އިތުރުކަމެއް ވެސް އެބައޮތެވެ. މުބާރާތް ކާމިޔާބު ކުރުމުނެ މެސީ ބޭނުންވީ، އެ ޓީމުގެ ޑިއަންޑްރޭ ޔެޑްލިން ތަށި އުފުލާ ލުމަށެވެ. އެއީ އޭނާއަކީ މެސީ އައުމުގެ ކުރިން މުޅި ސީޒަނުގައި ޓީމުގެ ކެޕްޓަންގެ ޒިންމާ ނެގި ކުޅުންތެރިޔާއަށް ވީތީއެވެ.