ކެމްޕޭނަށް ހުރަސް އެޅުމާއި އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫންކަމުގައި މިނިސްޓަރ އޮފް ހޯމް އެފެއާޒް ޢިމްރާން ޢަބުދުﷲ ވިދާޅުވެއްޖެއެވެ.

މިނިސްޓަރ ޢިމްރާން މިހެން ވިދާޅުވީ، ރިޔާސީ އިންތިޚާބުގެ ކެމްޕޭނުގެ ތެރެއިން މިއަދު ހިނގި ހަމަނުޖެހުންތަކާއި ގުޅިގެން ކަންބޮޑުވުން ފާޅުކުރައްވައި ކުރެއްވި ޓްވީޓެއްގައެވެ.

މިނިސްޓަރ އިމްރާން ވިދާޅުވީ، ކެމްޕޭނުކުރުމުގައިވެސް އަދި ކެންޑިޑޭޓަކަށް ތާއީދުކުރާކަން ހާމަކުރުމުގައިވެސް އެއްވެސް ފަރާތަކުން ތަހުޒީބު މުޖުތަމައުތަކުގައި ގެންގުޅޭ ހަމަތަކުން އެއްކިބާވެ ކެމްޕޭނަކަށް ހުރަސްއަޅާ އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫންކަމަށާއި، އެފަދަކަންކަމުން ދުރުވެތިބުމަށް ގޮވާލައްވާ ކަމަށެވެ.

ކެމްޕޭންތަކަށް ހުރަސް ނޭޅުއްވުމަށް ހޯމް މިނިސްޓަރ އިމްރާން މިގޮތަށް ގޮވާލެއްވިއިރު، މިއަދު ހަވީރު، މާލެ އަތޮޅު ގުރައިދޫގައި ވަނީ އެމްޑީޕީގެ ސަޕޯޓަރުންނާއި ޕީޕީއެމްގެ ސަޕޯޓަރުންނާއި ދެމެދު ކުރިމަތިލުންތަކެއް ހިނގައި ބައެއް މީހުންނަށް އަނިޔާވެފައެވެ. އަދި އެމައްސަލައާއި ގުޅިގެން މީހަކު ހައްޔަރުކޮށްފައިވާ ކަމުގައިވެސް ފުލުހުންގެ އިދާރާއިން ވަނީ ބުނެފައެވެ.

މީގެ އިތުރުން އަމިއްލަ ގޮތުން އިންތިޚާބުގައި ވާދަކުރައްވާ ކެންޑިޑޭޓް އުމަރު ނަސީރުވެސް އޭނާ މިއަދު ބޭއްވެވި ކެމްޕޭން ރެލީއެއްގެ ތެރެއިން މީހަކު އޭނާއަށް ހަމަލާއެއް ދިންކަމުގައި ވަނީ ވިދާޅުވެފައެވެ. އުމަރު ތުހުމަތު ކުރައްވާފައިވާ ގޮތުގައި އޭނާއަށް ހަމަލާދީފައި ވަނީ، މަސްތުވާތަކެތީގެ ވިޔަފާރި ކުރާ މީހެކެވެ.

ރިޔާސީ އިންތިޚާބުގެ ކެމްޕޭން ފޯރި ގަދަވަމުން އަންނައިރު، މީގެ ކުރިން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައެއް ރަށްރަށަށް ކުރެއްވި ދަތުރުފުޅާއި ދިމާކޮށް ޕީޕީއެމްގެ އެކްޓިވިސްޓުން ހަމަނުޖެހުން ހިންގުމަށް މަސައްކަތް ކޮށްފައިވެއެވެ. މީގެ އިތުރުން ގދ އަތޮޅަށް ރައީސް ކުރެއްވި ދަތުރުފުޅާއި ދިމާކޮށް މަޑަވެލީގައި ޖަލްސާ ބާއްވަން ތައްޔާރުކުރި ތަނުގައި ބަޔަކު ރޯކޮށްލައި އަންދާލާފައިވެއެވެ.