ހއ. ފިއްލަދޫ "ޓޫރިސްޓް ވިލެޖް" އިން ފަތުރުވެރިކަމުގެ ވިޔަފާރިއަށް ދިގުމުއްދަތަކަށް 99 ބިމެއް ދޫކުރަން ހުޅުވާލައިފިއެވެ. ފިއްލަދޫ ކައުންސިލުން ވިދާޅުވީ، މި ބިންތައް ދޫކުރަނީ ފަތުރުވެރިކަމުގެ ވިޔަފާރިން ރަށުގެ ރައްޔިތުންނަށް ގިނަގުނަ ފައިދާ ލިބިދޭނެ ގޮތަށް ފުޅާ ދާއިރާއެއްގައި ވިޔަފާރި ތަރައްގީ ކުރުމުގެ ގޮތުންކަމަށެވެ.

ފިއްލަދޫ "ޓޫރިސްޓް ވިލެޖް" އިން 99 ބިން ޓޫރިޒަމް ވިޔަފާރިއަށާއި ގުޅުންހުރި ވިޔަފާރިތަކަށް ދިގު މުއްދަތަކަށް ދޫކުރަން ހުޅުވާލާފައިވާއިރު ކައުންސިލުން ވިދާޅުވީ، މީގެ ބޭނުމަކީ ވިޔަފާރިބިންތަކުން ކައުންސިލަށް އާމްދަނީ ހޯދުމަށާއި، އެބިންތަކުން ވިޔަފާރިވެރިންނަށް މާލީފައިދާ ހޯދުމުގެ ފުރުޞަތު ހުޅުވާލުމަށާއި، ދެމެހެއްޓެނި ގޮތެއްގައި މިބިންތައް ވިޔަފާރި އުޞޫލުން ބޭނުން ކުރުމަށް ހުޅުވާލުންކަމަށެވެ. ފިއްލަދޫ ޓޫރިޒަމް ޒޯނުން ދޫކުރަނީ 5000 އަކަފޫޓުން 115000 އަކަފޫޓާ ދެމެދުގެ ބިންތަކެކެވެ.

ފިއްލަދޫ "ޓޫރިސްޓް ވިލެޖް" ގެ ކުރެހުމެއް

ބީލަން ހުށަހެޅޭނީ، ވިޔަފާރި ރަޖިސްޓްރީ ކުރުމުގެ ޤާނޫނު ގެދަށުން އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ ކުންފުނި ތަކަށާއި، އަމިއްލަ ފަރުދުންގެ ވިޔަފާރިއާބެހޭ ޤާނޫނު ގެދަށުން އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ އަމިއްލަ ވިޔަފާރި ތަކަށެވެ.

ހއ. ފިއްލަދޫ "ޓޫރިސްޓް ވިލެޖް" އިން ފަތުރުވެރިކަމުގެ ވިޔަފާރިއަށް ދޫކުރާ މި ބިންތަކަށް ޝަޢުޤުވެރިވާ ފަރާތްތަކުން 28 އޮގަސްޓް 2023 ވާ ހޯމަ ދުވަހުގެ 13:00 ގެ ކުރިން ޕްރޮޕޯސަލް ހުށައެޅުމަށް ރަޖިސްޓްރީކުރުމަށް ކައުންސިލުން ވަނީ އެދިފައެވެ. ޕްރޮޕޯސަލް ހުށައަޅާނީ 04 ސެޕްޓެމްބަރ 2023 ވާ ހޯމަ ދުވަހުގެ 11:00 އަށްކަމަށްވެސް ކައުންސިލުން ވަނީ އެދިފައެވެ.

40،000 އަކަފޫޓަށްވުރެ ދަށުގެ ބިންތަކާއި އަދި 40،000 އަކަފޫޓަށްވުރެ ބޮޑެތި ބިންތަކަށް ޕޮއިންޓް ދޭގޮތުގެ އުސޫލު ފިއްލަދޫ ކައުންދިލުން ވަނީ އާންމުކޮށްފައެވެ. ކައުންސިލުން ވިދާޅުވީ، މި ބިންތައް ދޫކުރަނީ 50 އަހަރުގެ މުއްދަތަކަށްކަމަށެވެ.