ބައެއް ކެންޑިޑޭޓުން ޚުދުމުޚުތާރު ވެރިކަމެއް ކުރައްވަން ބޭނުންފުޅުވެވަޑައިގެން އުޅުއްވާކަމަށް ހީފުޅުވާކަމުގައި ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބުދުލް ޤައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރިޔާސީ އިންތިޚާބުގައި ވާދަކުރައްވާ ކެންޑިޑޭޓުން ވެވަޑައިގަންނަވާ ވަޢުދުތަކާއި ދައްކަވަމުން ގެންދަވާ ވާހަކަފުޅުތަކާއި ގުޅިގެން ކުރެއްވި ޓްވީޓެއްގައެވެ.

ރައީސް މައުމޫނު ވަނީ، ޤާނޫނުތަކާއި އުސޫލާއި ހަމައަށް ބެއްލެވުމެއްނެތި ބައެއް ކަންކަން ކުރައްވާނެކަމަށް ވިދާޅުވެ ބައެއް ކެންޑިޑޭޓުން ދައްކަވަމުން ގެންދަވާ ވާހަކަފުޅު ތަކާއި މެދި ކަންބޮޑުވުން ފާޅުކުރައްވާފައެވެ. މިގޮތުން އެމަނިކުފާނު ވަނީ، ބައެއް ކޭންޑިޑޭޓުން ވާހަކަ ފުޅު ދައްކަވާއިރު ހީވަނީ ޚުދު މުޚުތާރު ވެރިކަމެއް ކުރައްވަން ބޭނުންފުޅު ވާހެންކަމަށާ،  ވަގުތުން މިވެނި ކަމެއް ކުރައްވާނަމޭ ވަގުތުން މިވެނި ކަމެއް ހުއްޓުވާނަމޭ ވިދާޅުވާއިރު އެކަމެއް ކުރަން އޮންނަ ޤާނޫނީ ހަމަތަކާއި ޑިއުޕްރޮސެސް ކޮބައިތޯ ރައީސް މައުމޫނުވަނީ ސުވާލު ކުރައްވާފައެވެ.

ރިޔާސީ އިންތިޚާބަށް ކުރިމަތިލައްވައިގެން ކެމްޕޭންކުރައްވަމުން ގެންދަވާ، ޕީއެންސީ ކެންޑިޑޭޓް ޑރ މުޙައްމަދު މުޢިއްޒު ވަނީ، އެމަނިކުފާނަށް ވެރިކަން ލިބިވަޑައިގަންނަވާ ދުވަހު، ރައީސް ޔާމީން މިނިވަން ކުރައްވާނެ ކަމުގައި ވިދާޅުވެފައެވެ. ޤާސިމް އިބްރާހިމް ވަނީ، ހުޅުމާލޭގެ ފްލެޓްތަކާއި ބިންތަކުގެ ކުޅި މަޢާފްކުރާނެ ކަމުގައި ވިދާޅުވެފައެވެ. އުމަރު ވަނީ މަސްތުވާތަކެއްޗާއި މާރާމާރީގެ ކުށްތައް ހުއްޓުވައި، މަރުގެ ޙުކުމް ތަންފީޒްކުރައްވާނެ ކަމަށް ވިދާޅުވެފައެވެ.

މިފަހަރުގެ ރިޔާސީ އިންތިޚާބުގައި ޖުމުލަ 8 ކެންޑިޑޭޓުން ވާދަަކުރެއެވެ. އޭގެ ތެރެއިން ކެމްޕޭންގައި ޢަމަލީ ގޮތުން އުޅުއްވާތީ ފެންނަނީ ތިން ކެންޑިޑޭޓުންނެވެ.