ދިރާސީ އަހަރު ފެށުން ކުރިން އޮތްގޮތަށް ބަދަލު ކުރައްވާނެ ކަމުގައި ވިދާޅުވެ، ރިޔާސީ އިންތީޚާބުގައި ވާދަކުރައްވާ ކެންޑިޑޭޓް ޑރ މުޙައްމަދު މުޢިއްޒު ދެއްކެވި ވާހަކަފުޅާއި މެދު ޓީމުން ނުރުހުންފާޅުކޮށްފިއެވެ.

އެމަނިކުފާނަށް ވެރިކަން ލިބިވަޑައިގެންފިނަމަ، ދިރާސީ އަހަރުގެ ކިޔެވުން ފެށުން 2025 ވަނަ އަހަރުން ފެށިގެން ޖެނުއަރީމަށް ބަދަލުކުރައްވާނެ ކަމުގައި ޑރ މުޙައްމަދު މުޢިއްޒު ވިދާޅުވީ، ދ ކުޑަހުވަދޫގައި ބޭއްވި ކެމްޕޭން ބައްދަލުވުމެއްގައެވެ.

ދިރާސީ އަހަރުގެ ކިޔެވުން ޖެނުއަރީއަށް ބަދަލުކުރައްވާނެ ކަމުގައި މުޢިއްޒު ވިދާޅުވުމާއި ގުޅިގެން ރާއްޖޭގެ ރިޒޯޓުތަކުގައި މަސައްކަތްކުރާ ދިވެހި މުވައްޒަފުންގެ ޖަމިއްޔާ، ޓީމުން ވަނީ މުޢިއްޒަށް ފާޑު ކިޔާފައެވެ. ރާއްޖޭގެ ފަތުރުވެރިކަމުގެ ސިނާޢަތުގައި މަސައްކަތް ކުރާ އެތައް ހާސް މުވައްޒަފުންނެއް އެބަތިއްބެވެ.

މުއިއްޒުގެ ވާހަކައަށް ފާޑުކިޔައި ޓީމުން ބުނެފައި ވަނީ، ދިރާސީ އަހަރު އޮގަސްޓްމަހު ފަށާގޮތަށް ސަރުކާރުން ގެނެސްފައިވާ ބަދަލަކީ ރަނގަޅު ބަދަލެއް ކަމަށެވެ.

ދިރާސީ އައު އަހަރު އޮގަސްޓް މަހު ފަށާގޮތަށް ސަރުކާރުން ބަދަލުކުރީ އެކަމާއި ގުޅޭ ގޮތުން ކަމާއި ގުޅުން ހުރި އިދާރާތަކާއި، ފަތުރުވެރިކަމުގެ ސިނާޢަތުގައި މަސައްކަތް ކުރާ ފަރާތްތަކާއ އެކު މަޝްވަރާތައް ކުރުމަށް ފަހުގައެވެ.

ދިރާސީ އަހަރުގެ ކިޔެވުން އޮގަސްޓް މަހު ފަށާފައި، ވަނީ ކޯވިޑް-19ގެ އާލަމީ ވަބާ އާއި ގުޅުގެން ސްކޫލުތަކަށް ދަރިވަރުން ހާޟިރުވެ ކިޔަވައިދިނުން ފެށުމަށްފަހު، 2021 ވަނަ އަހަރުގައެވެ.

ދިރާސީ އައު އަހަރު ފެށުމަށް ގެނައި ބަދަލަކީ އާއްމުންގެ މެދުގައި ޚިޔާލު ތަފާތުވުންތައް އޮތް މައްސަލައެކެވެ/