ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަރިއަތޮޅަށް ފެއްޓެވި ކެމްޕޭން ދަތުރުފުޅު އެމަނިކުފާނު އާލާސްކަންފުޅާއި އުޅުއްވާތީ މެދުކަނޑުއްވާލައްވައިފިއެވެ.

އެމްޑީޕީގެ ކެމްޕޭން ތަރުޖަމާން އަލްއުސްތާޛާ މާރިޔާ އަޙްމަދު ދީދީ ވިދާޅުވީ، ރައީސުލްޖުމްހޫރިއްޔާވެސް އުޅުއްވަނީ މިހާރު އުޅޭ ރޯގާގެ އާލާސްކަންފުޅުގައި ކަމަށާއި، އާލާސްކަންފުޅުން ފަސޭހަފުޅުވިހާ އަވަހަކަށް އަލުން ދަތުރުތައް ފައްޓަވާނެ ކަމަށެވެ.

ރައީސުލްޖުމްހޫރިއްޔާގެ އަރިއަތޮޅު ދަތުރުފުޅު ފެއްޓެވީވެސް އެމަނިކުފާނު އާލާސްކަންފުޅާ އުޅުއްވާތީ ކުރިން ތާވަލުކޮށްފައި އޮތް ދުވަހަށްވުރެ އެއްދުވަސް ފަހުންކަންވެސް އެމަނިކުފާނުގެ ކެމްޕޭނުގައި ހަރަކާތްތެރިވާ ބައެއް ފަރާތްތަކުން ފާހަގަކުރެއްވިއެވެ.

ކެމްޕޭނާއި ބެހޭ ގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި މާރިޔާ ވިދާޅުވީ، މިފަދަކަމެއް ރައީސް ޔާމީންގެ ދައުރުގައި ކުރިމަތިވެ ކެމްޕޭން މެދުކަނޑާލަން ޖެހުނުނަމަ އެއީ ސިހުރުހެދީކަމަށް ބަލައި އެތައް ބަޔަކު ހައްޔަރު ކުރީސް ކަމަށެވެ. މިގޮތުން މާރިޔާ ވަނީ 2018ގެ ކެމްޕޭންގެ ތެރޭގައި އެމްޑީޕީއަށް ވެރިކަން ހޯދައިދޭން ސިހުރު ހެދިކަމަށް ބުނެ ކުޅުދުއްފުށިން ބަޔަކު ހައްޔަރުކުރިކަންވެސް ފާހަގަކުރައްވާފައެވެ.

ރިޔާސީ އިންތިޚާބަށް ކެމްޕޭން ކުރުމަށް ދެން ކެންޑިޑޭޓުންނަށް ބާކީ އޮތީ ތިން ހަފްތާއެވެ. ރިޔާސީ އިންތިޚާބުގެ ކެމްޕޭނަށް ރައީސުލްޖުމްހޫރިއްޔާ މިހާރު ވަނީ ބޮޑުތިލަދުންމަތީގައި ހިމެނޭ ހުރިހާ އަތޮޅަކަށާއި، މުލަކަތޮޅާއި ނިލަންދެއަތޮޅު ދެކުނުބުރިއާ ހުވަދުއަތޮޅާއި ފުވައްމުލަކުގެ އިތުރުން އައްޑޫ ސިޓީއަށް ވަޑައިގެންފައެވެ.

މީގެ އިތުރުން އެމްޑީޕީގެ ރިޔާސީ ކެންޑިޑޭޓްގެ ރަނިންމޭޓް މުޙައްމަދު އަސްލަމް މިހާރު ގެންދަވަނީ އަތޮޅުތެރޭގެ ރަށްރަށަށް ދަތުރު ކުރައްވައި ކެމްޕޭން ކުރައްވަމުންނެވެ.