އޮތެންޓިކް މޯލްޑިވްސްގެ އައުޓްލެޓެއް ގަން އިންޓަނޭޝަނަލް އެއަރޕޯޓްގެ ޓްރާންސިޓް ލައުންޖްގައި ހުޅުވައިފިއެވެ. މި އައުޓްލެޓް  ހުޅުވައިދެއްވީ އިއްޔެ އައްޑޫ ސިޓީގެ މޭޔަރ އަލީ ނިޒާރެވެ.

“އޮތެންޓިކް މޯލްޑިސް“ ގެ ފިހާރަތަކަކީ އިކޮނޮމިކް މިނިސްޓްރީގެ އިސްނެންގެވުމުގެ ދަށުން ބިޒްނަސް ސެންޓަރ ކޯޕަރޭޝަނުން ހިންގަމުންދާ ފިހާރަތަކެކެވެ. އައްޑޫ އިންޓަނޭޝަނަލް އެއަރޕޯޓްގައި މި ހުޅުވުނު ފިހާރައަކީ މާލެ ސަރަހައްދުން ބޭރުން ދެކުނުގެ ސަރަހައްދުގައި ހުޅުވުނު ފުރަތަމަ ފިހާރައެވެ. މި ފިހާރައިގައި 70 އަށްވުރެ ގިނަ އުފެއްދުންތެރިންގެ އުފެއްދުންތައް ހުންނާނެކަމަށް ބީސީސީއިން ބުނެއެވެ. މި ފިހާރައިގެ ސަބަބުން އައްޑޫ ސިޓީގެ އިތުރުން ދެކުނުގެ އެހެނިހެން އަތޮޅުތަކުގައި ތިބި އުފެއްދުންތެރިންނަށް ފަހި ފުރުސަތެއް ލިބިގެންދާނެކަމަށް ބީސީސީއިން ބުނެއެވެ.

އޮތެންޓިކް މޯލްޑިވްސްގެ ފުރަތަމަ ފިހާރަ ހުޅުވާފައިވަނީ 2020 ވަނަ އަހަރު ވެލާނާ އިންޓަނޭޝަނަލް އެއަރޕޯޓްގެ ޑިއުޓީ ފްރީގައެވެ. އަދި މިހާރު މާލެ، ކުޑަވިލިނގިލި ރިސޯޓް އަދި ކްރޮސްރޯޑް މޯލްޑިވްސްގައިވެސް ވަނީ އޮތެންޓިކް މޯލްޑިވްސްގެ ފިހާރައެއް ހުޅުވާފައެވެ. މީގެއިތުރުން ޖަޕާން އެކްސްޓާނަރ ޓްރޭޑް ކޯޕަރޭޝަން އާއި ގުޅިގެން ޖަޕާނުގެ ކަންސާއީ އަދި ނަރީތާ އެއަރޕޯޓްގައި ދިވެހި އުފެއްދުންތެރިންގެ އުފެއްދުންތައް ވިއްކޭނެ އިންތިޒާމްވެސް ވަނީ ހަމަޖައްސާފައެވެ.

Advertisement

57 ސަޕްލަޔަރުންނާއިއެކު ފެށި ނަމަވެސް އޮތެންޓިކް މޯލްޑިވްސްގައި މިހާރު 250 ސަޕްލަޔަރުންގެ 3000 އަށްވުރެ ގިނަ އުފެއްދުންތައް އަންނަނީ ވިއްކަމުންނެވެ. އަދި މިއަހަރުގެ ޖުލައި މަހުގެ ނިޔަލަށް އޮތެންޓިކް މޯލްޑިވްސް މެދުވެރިކޮށް ކުރެވުނު ވިޔަފާރީގެ ގޮތުގައި 53 މިލިއަނަށްވުރެ ގިނަ ރުފިޔާ ދިވެހި އުފެއްދުންތެރިންނަށް ދީފައިވާކަމަށް ބީސީސީއިން ބުނެއެވެ.