ދިވެހީންގެ އުފެއްދުންތެރިކަމުގެ މައުރަޒުގައި ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ޤާއިމުކޮށްފައިވާ ސްޓޯލަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އެމަނިކުފާނުގެ އަނބިކަނބަލުން ޒިޔާރަތްކުރައްވައިފިއެވެ. 

ސްޓެލްކޯގެ އެކްސް އެކައުންޓުގައި ޝާއިޢުކުރި ޕޯސްޓެއްގައި ބުނެފައިވަނީ، ރައީސްގެ ދެކަނބަލުން މި ޒިޔާރަތުގައި ސްޓެލްކޯގެ ސްޓޯލާ ގުޅޭ މަޢުލޫމާތު ހޯއްދަވައި، ކުންފުނީގެ މުވައްޒަފުންނާއެކު ވަގުތުކޮޅެއް ހޭދަކުރެއްވިކަމަށެވެ. އަދި މިކަމަށްޓަކައި ރައީސް މުޢިއްޒަށާއި އަނބިކަނބަލުންނަށް ޚާއްޞަ ޝުކުރެއް ދަންނަވާކަމަށްވެސް ސްޓެލްކޯއިން ހާމަކޮށްފައިވެއެވެ. 

މި މައުރަޒުގައި ސަރުކާރު ހިއްސާވާ ކުންފުނިތަކުގެ ދާއިރާއިން އެއްވަނަ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް ވަނީ ލިބިފައެވެ.

ދިވެހީންގެ އުފެއްދުންތެރިކަމުގެ މައުރަޒު 2025 އަކީ ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމުގެ މަޤްޞަދުގައި ބާއްވާ މައުރަޒެކެވެ. މި މައުރަޒު ކުރިއަށްދަނީ 23 މެއި އިން 31 މެއިގެ ނިޔަލަށެވެ. މައުރަޒު އިންތިޒާމްކޮށް ކުރިއަށް ގެންދަނީ މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި، ބިޒްނަސް ސެންޓަރ ކޯޕަރޭޝަން (ބީ.ސީ.ސީ) ގުޅިގެންނެވެ.