4 ރަށެއްގައި ތަރައްޤީކުރާ ހޮސްޕިޓަލް އެޅުމަށް ހަމަޖެހިފައިވާ ބިން ކޮންޓްރެކްޓަރުންނާއި ހަވާލުކޮށްފިއެވެ. ބިން ހަވާލުކުރި ރަށްތަކުގެ ތެރޭގައި ހިމެނެނީ ތުލުސްދޫ، މިލަންދޫ، ވެލިދޫ އަދި ފުނަދޫ އެވެ.

މި ތިން ރަށުގެ ހޮސްޕިޓަލް ތަރައްޤީކުރުމަށް ހަވާލުކުރައްވާފައިވަނީ އާނަންޑް ބިލްޑް ޓެކް ޕްރައިވެޓް ލިމިޓެޑާއެވެ. މިރަށްރަށުގައި ތަރައްޤީކުރަނީ 30 އެނދުގެ ހޮސްޕިޓަލްތަކެވެ. މި 3 ހޮސްޕިޓަލްގެ މަސައްކަތް އެކުންފުންޏާއި ހަވާލުކޮށްފައިވަނީ މިއަހަރުގެ މެއިމަހުގެ ތެރޭގައި ދޮޅުއަހަރުގެ ތެރޭގައި މަސައްކަތް ނިންމާ ސަރުކާރާއި ހަވާލުކުރާގޮތަށެވެ.

ބިން ހަވާލުކުރި ފުނަދޫގެ ހޮސްޕިޓަލް ތަރައްޤީކުރަނީ އިންޑިޔާގެ ކުންފުންޏެއް ކަމަށްވާ ސިޓްރަމަސް ހެވީ އިންޑަސްޓްރީސް އިން ޖޭވީ ވިތު ފްލެޒިންކް ޕްރައިވެޓް ލިމިޓެޑުންނެވެ. މިމަސައްކަތް އެކުންފުންޏާއި ހަވާލުކޮށްފައިވަނީ މިދިޔަ ޖުލައިމަހުގެ ތެރޭގައި 135 މިލިއަނަށްވުރެ ގިނަ ރުފިޔާއަށް ދޮޅު އަހަރުގެ ތެރޭގައި ނިންމާގޮތަށެވެ.

ރައީސް އިބްރާހިމް މުހައްމަދު ސާލިހްގެ ސަރުކާރުގެ އެންމެ މުހިންމު އެއް ސިޔާސަތަކީ ބޭސްފަރުވާ ހޯދަން މާލެއަށް ބަރޯސާވެފައި އޮތް އޮތުން ނިމުމަކަށް ގެނައުމެވެ. އެހެންކަމުން އަތޮޅުތެރޭގައި ސިއްހީ ނިޒާމް ވަރުގަދަކުރުމުގެ މަސައްކަތް ދަނީ ކުރަމުންނެވެ. މި މަސައްކަތުގެ ދަށުން 5 ސަރަޙައްދެއްގައި ޓަރޝަރީ ހޮސްޕިޓަލް ތަރައްޤީކުރުމުގެ މަސައްކަތް ދަނީ ކުރަމުންނެވެ.

ރާއްޖޭގެ އާބާދީ ބޮޑު ސަރަހައްދުތަކުގެ ސަރަޙައްދީ ހޮސްޕިޓަލްތަކުގެ ފެންވަރު މަތިކުރުމަށް ކުރިއަށްގެންދިޔަ މަޝްރޫޢުތަކާއި ސިއްޙީ މަރުކަޒުތައް އަޕްގްރޭޑްކުރުމަށް ހިންގި އެކި މަޝްރޫޢުތަކުގެ ތެރެއިން ވިއްސަށްވުރެ ގިނަ މަޝްރޫޢުގެ މަަސައްކަތް ނިމިފައިވާކަމަށް ސަރުކާރުން ވިދާޅުވެއެވެ.