ރާއްޖެއަށް މިވަގުތު އެންމެ ރަގަޅު ގޮތަކީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާއި ދަ ޑިމޮކްރެޓްސް ގުޅުންކަމަށް ކުރީގެ ރައީސް މުޙައްމަދު ނަޝީދު ބުނިބުނުމަށް، ޑިމޮކްރެޓްސްގެ ރައީސް އިމްތިޔާޒް ފަހުމީ (އިންތި) މަރުހަބާ ދަންނަވައިފިއެވެ.

ރައީސް ނަޝީދު ސޯޝަލް މިޑިއާގައި ފާޅުކުރެއްވި މި ޚިޔާލާ ގުޅިގެން އިންތި އެ ޕޯސްޓުގައި ލިޔުއްވާފައިވަނީ "ރައީސް މުހައްމަދު ނަޝީދުގެ މި ވިސްނުންފުޅަށް މަރުޙަބާ ދަންނަވަން" ކަމަށެވެ.

ނަޝީދުގެ ހުށަހެޅުމަށް އިމްތިޔާޒު މަރުހަބާ ދަންނަވާފައިވާއިރު، އެމްޑީޕީގެ ޗެއާޕާސަން ފައްޔާޒު އިސްމާއިލް ވެސް ވަނީ ނަޝީދުގެ ހުށަހެޅުމާ އެއްކޮޅަށް ވާހަކަ ދައްކަވައިފައެވެ.

އެމްޑީޕީ އާއި ޑިމޮކްރެޓްސް ގުޅެން މިއަދު ނަޝީދު ގޮވައިލެއްވިއިރު، އެ ދެ ޕާޓީ އެކުގައި މަސައްކަތް ކުރަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހާއި ނަޝީދު ވެސް މީގެ ކުރިން ވަނީ ވިދާޅުވެފައެވެ.

ޑިމޮކްރެޓްސް އުފައްދާފައި ވަނީ އެމްޑީޕީގައި ކުރިން އިސްކޮށް ތިއްބެވި ބައެއް ބޭފުޅުންނާއި އެކުގައެވެ. ސީދާ ރަސްމީކޮށް އެކުގައި މަސައްކަތް ނުކުރި ނަމަވެސް ޤާނޫނުއަސާސީ ދިފާއުކުރުމާއި، ވެރިކަމުގެ ބާރުތައް ވަކިވެފައި އޮތުމާއި، މިނިވަން މުއައްސަސާތަކުގެ މިނިވަންކަން ދެމެހެއްޓުން ފަދަ ކަންކަމުގައި މި ދެ ޕާޓީގެ ޚިޔާލު އެއް ގޮތްކަން ފާހަގަކުރެވެއެެވެ.

ޑިމޮކްރެޓްސް އެފެދުނީ އެމްޑީޕީގެ ޗެއާރޕާސަން އިންތިހާބަށް ކެމްޕެއިން ކުރިއިރު އުފެދުނު ހިޔާލުތަފާތުވުންތަށް ގޯހުން ގޯހަށް ގޮސް، އެމްޑިޕީގެ ރިޔާސީ ޓިކެޓު ހޯދުމަށް ޕާޓީގެ އެތެރޭގައި ބޭއްވި އިންތިހާބުން ރައީސް ނަޝީދު ބަލިވުމަށްފަހު، އެ މަނިކުފާނު އިސްކޮށް ހުންނަވައިގެންނެވެ.