ޤައުމުން ބޭރުގައި ކިޔަވާ ކުދިންނަށް ފައިސާ ޖަމާވުން ލަސްވާ މައްސަލަ ހައްލުކޮށްދެއްވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އިނގިރޭސިވިލާތަށް ކުރެއްވި ދަތުރުފުޅުގައި އެޤައުމުގައި ދިރިއުޅެމުންދާ ދިވެހި ދަރިވަރުންނާއި ބައްދަލުކޮށް ވާހަކަދައްކަވަމުން ރައީސް ވިދާޅުވީ، ދަރިވަރުންނަށް އުނދަގޫވާ ކަންކަން އެ މަނިކުފާނަށް އެނގިލައްވާ ކަމަށާއި، އެކަންކަން ހައްލުކުރައްވާނެ ކަމަށެވެ. އެގޮތުން  ކިޔަވާ ކުދިންގެ ލޯން ފައިސާ އާއި ޓިއުޝަންފީ ލިބުން ލަސްވުމާއި، އަދި ސަރުކާރުގެ ކަމާބެހޭ އިދާރާތަކުން އެކިކަންކަމުގައި ޖަވާބުލިބުން ލަސްވުން ފަދަ މައްސަލަތަކަށް ޙައްލު ހޯއްދަވާނެކަމަށް ވިދާޅުވިއެވެ.

މީގެ އިތުރުން ރައީސުލްޖުމްހޫރިއްޔާ ވަނީ އިނގިރޭސިވިލާތުގައި ކިޔަވަމުންދާ ކުދިންގެ ބޭނުންތަކަށް، މީގެ ކުރިންވެސް އެ ޤައުމުގައި ދަރިވަރުން ބޭނުންކުރަމުންދިޔަ "ނަންބަރު 9، ރޯޒްމަންޓް އެވެނިއު" އަލުން ހަމަޖައްސަވާ ދެއްވާފައެވެ. މި ގެއަކީ އިނގިރޭސިވިލާތުގައި ކިޔަވަމުންދާ ކުދިންގެ އެކަމަޑޭޝަން ބްލޮކެއްގެ ގޮތުގައާއި، އެ ޤައުމުގައި އޮންނަ ދިވެހި ކިޔަވާކުދިންގެ އެސޯސިއޭޝަންގެ އެކިއެކި ބޭނުންތަކަށް ބޭނުންކުރަމުން ދިޔަ ތަނެކެވެ. މި އެސޯސިއޭޝަން ހިންގަމުން އައީ، އިނގިރޭސިވިލާތުގައި ދިރިއުޅޭ ދަރިވަރުންގެ އިޖުތިމާއީ ބޭނުންތަކާއި، ދުޅަހެޔޮކަން ކަށަވަރުކުރުމަށާއި، އެކުވެރިކަން ބަދަހިކުރުމުގެ ގޮތުން ތަފާތު ހަރަކާތްތައް ހިންގުމަށެވެ.

މީގެ އިތުރުން، ރާއްޖެއިން ބޭރުގައި ދިރިއުޅޭ ދަރިވަރުންނާ ގުޅޭ ކަންކަމުގައި ސަރުކާރުން ވަރަށް ބޮޑު އަހަމިއްޔަތުކަމެއް ދެއްވާނެކަމަށާއި، މިހާތަނަށް ލިބިފައިވާ ޝަކުވާތަކަށް ރިޢާޔަތްކޮށް، ކަންކަން ރަގަޅު ކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.