ގއ.ވިލިނގިލިން ބިން ހިއްކާ އިތުރު 100 ހައުސިން ޔުނިޓް އަޅުއްވައިދެއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވެއްޖެއެވެ.

ވިލިނގިލި އެމްޑީޕީ ޖަގަހައިގައި ބޭއްވި ޖަލްސާގައި ރައީސް ވިދާޅުވީ، ވިލިނގިލިން އަނެއްކާވެސް ބިން ހިއްކާ އެ ބިމުގައި އިޤްތިޞާދީ އެހެން މަސައްކަތްތައް ކުރިއަށްގެންދެވޭނެ ގޮތް ހައްދަވާދެއްވާނެކަމަށެވެ. އަދި ވިލިނގިލި ކައިރީގައި އޮތް ޑޮރަގައްލާ ފަރު ދަތުރުދާ ރަށެއްގެ ގޮތުގައި ހައްދަވާނެކަމަށް އެމަނިކުފާނު ވިދާޅުވިއެވެ.

ވިލިނގިއްޔަކީ މަސްވެރި ރަށެއްކަން ފާހަގަކުރައްވާ ރައީސް ވިދާޅުވީ އެ ސަރަޙައްދުން ބާނާ މަސް އެކީގައި ގަނެވޭނެ ގޮތާއި ފަސޭހައިން އައިސްލިބި ރައްކާކުރާނެ ގޮތާއި ވަގުތުން ފައިސާ ލިބޭނެ ގޮތް އަދިވެސް ހަދަންޖެހޭކަމަށެވެ. އަދި 2024 ވަނަ އަހަރުގެ މެދު ތެރެއަށް އަންނައިރު ކެޕޭސިޓީ އިތުރުވެ މަސް ގަނެވޭނެ ގޮތް މަގު ފަހިވެގެންދާނެ ކަމަށް އެމަނިކުފާނު ވިދާޅުވިއެވެ.

މަސްވެރިކަމުގެ ސިނާއަތް ތަރައްޤީ ކުރުމަށްޓަކައި މަސް ޕްރޮސެސްކުރެވޭނެ އިތުރު ގޮތްތައް ހޯދުމަށް ވޯލްޑް ބޭންކާއެކު މަޝްވަރާކުރައްވާފައިވާކަން އެމަނިކުފާނު ފާހަގަކުރެއްވިއެވެ. އަދި ގއ،ގދ،ޏ، ސ އަތޮޅުގެ މަސްވެރިކަން ކުރާ ރަށްރަށަށް އެކަމުގެ އެހީތެރިކަން ފޯރުކޮށްދިނުމަށް 54 މިލިޔަން ޑޮލަރުގެ އެހީއެއް ވޯލްޑް ބޭންކުން ލިބިފައިވާކަން ރައީސް ފާހަގަކުރެއްވިއެވެ. އަދި އެހީ ރައްޔިތުންނަށް ފޯރުކޮށްދީ މަދުވެގެން 2 ކޭނިން ފެކްޓްރީ އެޅުމުގެ ޕްލޭން އޮތްކަން އެމަނިކުފާނު ފާހަގަކުރެއްވިއެެވެ.