އެމްޑީޕީ ކޯލިޝަންގެ ރިޔާސީ ކެންޑިޑޭޓްގެ ކެމްޕޭނަށް ގދ. މަޑަވެލީގައި ބާއްވާ ޖަލްސާަަށް ތައްޔާރުކޮށްފައިވާ ތަނުގައި އަލިފާންރޯކޮށް ތަނަށާއި ތަކެއްޗައް ގެއްލުންދީ ހިންގާފައިވާ އަމަލުތައް އެމްޑީޕީން ކުއްވެރިކޮށްފިއެވެ.

އެމްޑީޕީން ނެރުނު ބަޔާނުގައި ބުނީ، ކެމްޕެއިން ކުރުމުގެ ހައްގަކީ ކޮންމެ ކެންޑިޑޭޓަކަށްވެސް އެއްވެސް ބިރުވެރިކަމެއްނެތި، މިނިވަންކަމާއެކީ ކުރެވެންޖެހޭނެ ކަމެއްކަމަށް އެޕާޓީން ދެކޭ ކަމަށެވެ. އަދި އެއްވެސް ކެންޑިޑޭޓެއްގެ ކެމްޕެއިނެއް ކުރިއަށްދާ ވަގުތު އެ ކެމްޕެއިނަށް ހުރަސްއެޅޭ ގޮތަށް އެއްވެސް ހަރަކާތެއް ހިންގުމަކީ އިންތިހާބުތަކާބެހޭ އާއްމު ގާނޫނުގެ ދަށުން މަނާކަމެއްކަމުން، މިފަދަ ކަންކަމުން ވާދަވެރި އެހެން ކެންޑިޑޭޓުންނާއި އެ ކެންޑިޑޭޓުންނަށް ތާއީދުކުރާ ފަރާތްތަކުން ހުއްޓައިލުމަށާއި، އެ ބައެއްގެ ކެންޑިޑޭޓުގެ ކެމްޕެއިން މަސައްކަތައިގެން ކުރިއަށް ދިއުމަށް އިލްތިމާސްކުރާކަމަށް އެމްޑީޕީން ނެރުނު ނޫސްބަޔާނުގައި ވަނީ އިލްތިމާސްކޮށްފައެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރިޔާސީ އިންތިޚާބުގައި މިއަދު ހެނދުނު މަޑަވެއްޔަށް ވަޑައިގެންނެވި އިރު، މަޑަވެލީގައި ކެމްޕޭން ބައްދަލުވުމަށް ތައްޔާރުކޮށްފައި އޮތްތަނުގައި ރޭ ބަޔަކު ވަނީ ރޯކޮށްލާފައެވެ. 

މަޑަވެލީގައި އެކަމާއި ގުޅޭ ގޮތުން ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، އެފަދަ ޢަމަލުތަކުން ދޭހަވާ އެއްކަމަކީ މިކުރާ ކެމްޕޭނުގައި ކުރިއަށް އޮތް ރިޔާސީ އިންތިހާބުން ބޮޑުތަނުން އެމަނިކުފާނަށް ކާމިޔާބުވާ ތަން ވާދަވެރިންނަށް ފެނި އެކަން ހުއްޓުވުމަށް ކުރާ ކަމެއްކަން ކަމަށެވެ.

ރައީސް ޞާލިޙްގެ ކެމްޕޭނަށް ހުރަސް އެޅުމަށް، ރައީސް ނަޝީދުގެ ދަ ޑިމޮކްރެޓްސްއިން މަސައްކަތް ކުރާއިރު، އެޕާޓީގެ މައިގަނޑު ގޮތެއްގައި ކުރަނީ ރައީސް ޞޯލިޙަށް އެންޓިކެމްޕޭނެވެ.