މުއިއްޒުއާއި ގާސިމްގެ ފޯމު އިލެކްޝަންސް ކޮމިޝަނަށް ހުށައަޅައިފިއެވެ. މިއަހަރުގެ ރިޔާސީ އިންތިހާބުގައި ވާދަކުރައްވާ މި 2 ކެނޑިޑޭޓުންގެ ފޯމު އިލެކްޝަންސް ކޮމިޝަނަށް ހުށައަޅާފައިވަނީ މިއަދުއެވެ.

އިދިކޮޅު ކޯލިޝަންގައި ހިމެނޭ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ރިޔާސީ އިންތިހާބުގައި ވާދަކުރަން މުއިއްޒުގެ ކެންޑިޑެސީ ފޯމް ހުށަހެޅުއްވީ މުއިއްޒާއި އޭނާގެ ރަނިން މޭޓް، ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް މިއަދު ހެނދުނު 9:30 ހާއިރު، ދަރުބާރުގޭގައި ގާއިމްކޮށްފައިވާ އީސީގެ އިންތިހާބީ މަރުކަޒަށް ވަޑައިގެންނެވެ. ފޯމާ ހަވާލުވެވަޑައިގަތީ އީސީގެ ރައީސް ފުއާދު ތައުފީގު އެވެ.

ގާސިމްގެ ފޯމު އިލެކްޝަންސް ކޮމިޝަނަށް ހުށައެޅުއްވީ ޖުމްހޫރީ ޕާޓީގެ މައި މަރުކަޒު ހުންނަ މ. ކުނޫޒުން ފެށިގެން ދަރުބާރުގެއަށް ސަޕޯޓަރުންނާ އެކު ހިންގަވާފައި ވަޑައިގެންނެވެ. ފޯމު ހުށައަޅުއްވާފައިވަނީ ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓު ގާސިމް އިބްރާހިމްއެވެ. ގާސިމްގެ ފޯމު ހުށައަޅާފައިވަނީ މިއަދު ހެނދުނު 10 ޖެހިއިރުއެވެ.

މަޖީދީ މަގުން ބޮޑުތަކުރުފާނު މަގަށް އަޅައިގެން އަމީނީ މަގުން ހިންގާފައި ގާސިމާއި ޕާޓީގެ އިސް ބޭފުޅުން އަދި ސަޕޯޓަރުން ވަޑައިގެންނެވި އިރު ހުރީ ގާސިމްގެ ކެމްޕޭނުގައި ބޭނުންކުރާ ލަވަތައް ޖަހާފަ އެވެ. އަދި ތިބީ ގައުމީ ދިދަ ހިފައިގެންނެވެ.