ކަސްޓަމްސްގެ ޚިޔާނާތުގައި ތުހުމަތުވި ބަޔަކު ރިޓަޔާ ކޮށްފައި ނުވާކަމުގައި މޯލްޑިވްސް ކަސްޓަމްސް ސަރވިސްއިން ވިދާޅުވެއްޖެއެވެ.

ކަސްޓަމްސް ސަރވިސްއިން ވިދާޅުވީ އެ އިދާރާގެ އޮފިސަރުންތަކެއްގެ މައްޗަށް ތުހުމަތު ކުރެވޭ، މަނީ ލޯންޑްރިންގ، ޚިޔާނާތް އަދި ރިޝްވަތާގުޅޭގޮތުން ދިވެހި ފުލުހުންގެ ޚިދުމަތުން ތަޙްޤީޤެއް ހިންގަމުން ގެންދާކަން މޯލްޑިވްސް ޕޮލިސް ސަރވިސަސްއިން ކަސްޓަމްސްއަށް އަންގާފައިވާ ކަމަށެވެ. އަދި އެ ތަޙްޤީޤުގައި ހިމެނޭ އޮފިސަރުންކަމަށް ދިވެހި ފުލުހުންގެ ޚިދުމަތުން އެއިދާރާއަށް މައުލޫމާތު ދެއްވާފައިވާ އެއްވެސް އޮފިސަރަކު ރިޓަޔާކޮށްފައި ނުވާކަމުގައިވެސް ކަސްޓަމްސްއިން ވަނީ ވިދާޅުވެފައެވެ.

މޯލްޑިވްސް ކަސްޓަމްސް ސަރވިސްގެ އޮފިސަރުންގެ މައްޗަށް ކުރެވޭ ޚިޔާނާތާއި މަނީ ލޯންޑަރިން އަދި ރިޝްވަތުގެ 400 މިލިޔަން ރުފިޔާގެ މައްސަލައެއް މި ހުސްވި އަހަރުގެ އޮގަސްޓް މަހުންފެށިގެން ބަލަމުން އަންނަ ކަމުގައި ފުލުހުންގެ އިދާރާއިން ވިދާޅުވީ އިއްޔެއެވެ. އެހެން ނަމަވެސް އެމައްސަލައިގައި ތުހުމަތު ކުރެވޭ ފަރާތްތަކުގެ ވަނަވަރެއް މިހާތަނަށްވެސް ފުލުހުންގެ އިދާރާއިންނާއި އަދި ކަސްޓަމްސްއިންވެސް ހާމަކުރައްވާފައެއް ނުވެއެވެ.

ސަރުކާރުގެ އިދާރާތަކުގެ އޮފިސަރުންގެ މަައްޗަށް ތުހަުމަތު ކުރެވޭ ކަޅުފައިސާ ދޮވުމާއި، ޚިޔާނާތާއި ފަސާދައިގެ މައްސަލަތައް މިދައުރުގެ ތެރޭގައި ވަނީ ބަލަން ފަށާފައެވެ. އެގޮތުން އެންމެ ފުރަތަމަ ފެންމަތިވީ، މޯލްޑިވިސް ކަރެކްޝަނަލް ސަރވިސްގެ އޮފިސަރުންތަކެއްގެ މައްޗަށް ތުހުމަތު ކުރެވުނު އެފަދަ މައްސަލަތަކެކެވެ. އެމައްސަލައިގައި ތުހުމަތު ކުރެވުނު މީހުންގެ ވަނަވަރު ފޮޓޯ އާއިއެކު ފުލުހުން އާއްމު ކުރި ނަމަވެސް، އޭގެ ފަހުން އެހެން އިދާރާތަކުގައި މަސައްކަތް ކުރާ އޮފިސަރުންނަށް ކުރެވުނު ތުހުމަތުތަކާއި ގުޅިގެން އެމީހުންގެ ވަނަވަރާއި ފޮޓޯ ފުލުހުން އާއްމުކޮށްފައެއް ނުވެއެވެ.