އިންގްލިޝް ޕްރިމިއަލީގު ހުޅުވުމުގެ ގޮތުން ކުޅޭ މެޗު, ނުވަތަ މި ސީޒަންގެ "ކޮމިއުޓީ ޝީލްޑް" މެޗު އާސެނަލް އިން ކާމިޔާބު ކޮށްފިއެވެ. އާސެނަލް މި މެޗު ކާމިޔާބުކުރީ, ޕްރިމިއަލީގު ފާއިތުވި 3 ސީޒަންގައި ވެސް ކާމިޔާބުކުރި މެންޗެސްޓަރ ސިޓީ ބަލި ކުރުމަށް ފަހުއެވެ.

މެޗުގައި ފުރަތަމަ ލީޑު ނަގާފައިވަނީ މެންޗެސްޓަރ ސިޓީއިންނެވެ. މި ގޯލު ކާމިޔާބު ކޮށްދިނީ ހާލަންޑްގެ ބަދަލު ކުޅުންތެރިއެއްގެ ގޮތުގައި 64 ވަނަ މިނެޓުގައި ކުޅެން ނިކުތް ޒުވާން ޕްލޭމޭކަރ ކޯލް ޕަރމާ އެވެ. އެއީ މެޗުގެ 77 ވަނަ މިނެޓުގައި ކެވިން ޑިބްރޫނޭ ދިން ބޯޅަ އަކުން, ޕެނެލްޓީ އޭރިއާ ތެރެއަށް ވަނުމަށްފަހު ގޯލުގެ ކަނާތް ފަޅީގައި ހުރެފައި, ވާތުފައިން ގޯލުގެ ވާތް ފަޅިއަށް ފޮނުވާލި ރީތި ބޯޅައަކުންނެވެ. މިދިޔަ ޖުލައި މަހު ކުރިޔަށް ދިޔަ 21 އަހަރުން ދަށުގެ ޔޫރޯ ފުޓުބޯޅަ މުބާރާތް އިނގިރޭސި ވިލާތަށް ކާމިޔާބު ކޮށްދިން ގޯލު ވެސް ޖަހާފައިވަނީ ޕަރމާއެވެ. 

ސިޓީއިން ލީޑުގައި އޮވެ މެޗު ނިމެން ދަނިކޮށް, އާސެނަލްގެ ގޯލު ކާމިޔާބުކޮށްދިނީ މިދިޔަ ސީޒަނުގައި އެޓީމަށް ބަދަލުވި ބެލްޖިއަމްގެ ކުޅުންތެރިޔާ ލެއަންޑްރޯ ޓްރޮސަރޑް އެވެ. އެއީ މެޗުގެ އިތުރު ވަގުތުގައެވެ. ޓްރޮސަރޑް ފޮނުވާލި ބޯޅަ ސިޓީގެ ޑިފެންޑަރ އަކަންޖީގެ ގައިގައިޖެހިފައި ޑިފްލެކްޓްވުމުން ކީޕަރ އޯޓެގާއަށް އޮޅުނީއެވެ.

Advertisement

މެޗުގެ ފުރިހަމަ ވަގުތު ހަމަވިއިރު 1-1 ގެ ނަތީޖާއަކުން އެއްވަރު ވެފައި ވުމުން, މެޗުން މޮޅުވި ޓީމު ކަނޑައެޅީ ޕެނަލްޓީ ޖަހައިގެންނެވެ. ޕެނަލްޓީ ޖަހައިގެން އާސެނަލް މެޗް ކާމިޔާބުކުރީ 4-1 ގެ ނަތީޖާއަކުންނެވެ. އާސެނަލްއިން ޕެނަލްޓީ ޖަހަން ދިޔަ ހުރިހާ ކުޅުންތެރިން ޕެނަލްޓީ ކާމިޔާބު ކުރި އިރު, ސިޓީގެ ޑި ބްރޫނޭ ޖެހި ޕެނަލްޓީ ޖެހުނީ ދަނޑީގައެވެ. އަދި ރޮޑްރީ ޖެހި ޕެނަލްޓީ ވަނީ އާސެނަލްގެ ރަމްސްޑޭލް މަތަ ކޮށްފައެވެ.

އާސެނަލްގެ ކޯޗު އާޓެޓާއަށް މިއީ ވަރަށް ބޭނުންވެފައި ހުރި މޮޅެކެވެ. އެއީ އޭނާއަށް ޕެޕް ގާޑިއޯލާ ބަލި މި ކުރެވުނީ ޖެހިޖެހިގެން 8 މެޗުން ޕެޕްގެ އަތް ދަށުވުމަށްފަހު ކަމަށްވާތީއެވެ.

އިންގްލިޝް ޕްރިމިއަލީގުގެ މެޗުތައް ފެށުމަށް ހަމަޖެހިފައިވަނީ މި އަންނަ ހޮނިހިރު ދުވަހުއެވެ.