ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ސެންޓަރ ފޮރ ހަޔަރ ސެކަންޑަރީ އެޑިއުކޭޝަންގެ މާލޭ ކެމްޕަސް ރޭ ހުޅުއްވައިދެއްވައިފިއެވެ.

ސީއެޗްއެސްސީގެ މާލެ ކެމްޕަސް ހުޅުވާފައި ވަނީ، ކުރިންވެސް މާލޭގައި ސީއެޗްއެސްސީ ހިންގަމުން އައި އަމީނިއްޔާ ސްކޫލުގެ އިރުން ހުރި ބައު އިމާރާތުގައެވެ. އެ އިމާރާތް ހުޅުވާފައި ވަނީ އެތަން އަލުން މަރާމާތު ކުރުމަށް ފަހުގައެވެ.

މި ރަސްމިއްޔާތުގައި، ސީ.އެޗް.އެސް.އީ.ގެ އެހާރާއި މިހާރުގެ ހަނދާނީ ރަމްޒެއް ރައީސުލްޖުމްހޫރިއްޔާއަށް ވެދުމަށް އަރުވާފައިވެއެވެ.

މިރަސްމިއްޔާތުގައި އެޑިޔުކޭޝަން މިނިސްޓަރ ވިދާޅުވީ، މާލޭގެ ސީ.އެޗް.އެސް.އީ އިމާރާތް ހުޅުމާލޭގައި އެޅުމާއި ގުޅިގެން ގިނަ ދަރިވަރުންތަކެއް މާލެއިން ސީ.އެޗް.އެސް.އީ. ހުޅުމާލެއަށް ދަތުރުކުރަންޖެހުމަކީ ވަރަށް ތަކުލީފުބޮޑު، އެކަމުގެ އުނދަގޫކަން ގިނަ ރައްޔިތުންނަށް އިހުސާސުވި ކަމެއް ކަމަށާއި މިކަމުގެ ޝަކުވާތައް އަޑުއައްސަވާ، މާލޭގައި އަލުން ސީ.އެޗް.އެސް.އީ ހުޅުވައި، ގާތުން ތަޢުލީމު ދިނުމުގެ ސިޔާސަތު ކަށަވަރުކުރުމަށް ރައީސުލްޖުމްހޫރިއްޔާ ނިންމެވި ނިންމެވުމަކީ ޝުކުރުވެރިކަމާއެކު މުޅި ތަޢުލީމީ ދާއިރާގެ އެންމެހާ ބޭފުޅުން ފާހަގަކުރައްވާ ކަމެއް ކަމަށެވެ. ވަޒީރުގެ ވާހަކަފުޅުގައި ސަރުކާރުގެ އެންމެ ބޮޑު އެއް އަމާޒަކީ އޯ ލެވެލް ނިންމާ ދަރިވަރުންނަށް އިތުރު ފުރުސަތުތައް ފަހިކޮށްދިނުން ކަމަށާއި އެގޮތުން ކުރިން އެގާރަ ސަތޭކައެއްހާ ކުދިން އޭ ލެވަލްގައި ބައިވެރިވާ ބައިވެރިވުން މިހާރު ދެހާހާއި ގާތްކުރާ ޢަދަދަކަށް މަތިކުރެވިފައިވާކަން ފާހަގަކުރެއްވިއެވެ.

ސެންޓަރ ފޮރ ހަޔަރ ސެކަންޑަރީ އެޑިއުކޭޝަން މާލޭގައި ރޭ އަލުން ހުޅުވިގެންދާއިރު އެ ސްކޫލުގައި މިހާރު 424 ދަރިވަރުން ދަނީ ތަޢުލީމު ހާޞިލްކުރަމުންނެވެ. ސެންޓަރ ފޮރ ހަޔަރ ސެކަންޑަރީ އެޑިއުކޭޝަން އެންމެ ފުރަތަމަ ހުޅުވާފައިވަނީ 3 ޖުލައި 1979 ވަނަ އަހަރުގައި ސައިންސް އެޑިޔުކޭޝަން ސެންޓަރުގެ ނަމުގައެވެ.