ވެރިކަމުގެ 4 އަހަރު ދުވަހުގެ ތެރޭގައި މަސްވެރިންނަށް އެންމެ ގިނަ އަދަދަކަށް ފައިސާ ދޫކޮށްފައިވަނީ މި ސަރުކާރުގެ 4 އަހަރުގެ ތެރޭގައިކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ. ފައުޒީ މިހެން ވިދާޅުވީ، ޓީވީ ޕްރޮގްރާމެއްގައި ވާހަކަ ދައްކަވަމުންނެވެ. 

އިސްމާއިލް ފައުޒީ ވިދާޅުވީ، ފާއިތުވި އެއްވެސް ދައުރެއްގައި މިފްކޯގެ ފެސިލިޓީތަކަށް މަސް ކިރާފައި ނުވާ މިންވަރަށް މިދިޔަ 4 އަހަރު ދުވަހުގެ ތެރޭގައި މަސް ކިރާފައިވާކަމަށެވެ. މިއާއިއެކު މަސްވެރިންނަށް ދޫކޮށްފައިވާ ފައިސާގެ އަދަދުވެސް އިތުރުވެފައިވާކަން އިސްމާއިލް ފާހަގަކުރެއްވިއެވެ. އެގޮތުން ނިމުނު 4 އަހަރުގެ ތެރޭގައި މަސްވެރިންނަށް 4.4 ބިލިއަން ރުފިޔާ ދޫކޮށްފައިވާކަމަށް އިސްމާއިލް ވިދާޅުވިއެވެ. ހުސްވި 2022 ވަނަ އަހަރަކީ މިފްކޯގެ ތާރީހުގައިވެސް އެންމެ ގިނަ އަދަދެއްގެ މަސްގަނެ އެންމެ ބޮޑު އަދަދެއް މަސްވެރިންނަށް ދޫކުރި އަހަރެވެ. އަދި މިދިޔަ އަހަރުގެ މި މުއްދަތާއި އަޅާބަލާއިރު މިއަހަރުގެ މި މުއްދަތުގައި މިފްކޯއަށް ކިރާފައިވާ މަހުގެ އަދަދާއި ދޫކޮށްފައިވާ ފައިސާގެ އަދަދު އިތުރުކަން އިސްމާއިލް ފާހަގަކުރެއްވިއެވެ.

އަހަރުގެ މިހާތަނަށް މިފްކޯއަށް ވަނީ 41,000 ޓަނުގެ މަސް ކިރާފައެވެ. އަދި މަސްވެރިންނަށް ވަނީ 684 މިލިއަން ރުފިޔާ ދޫކޮށްފައެވެ. 

މިފްކޯ ތަރައްޤީކުރުމަށް މި ސަރުކާރުން ފަށާފައިވާ ބިޔަ ޕްރޮޖެކްޓްތަކާއިއެކު ސަރުކާރުގެ އަމާޒަކީ މަސްވެރިންނަށް ލިބޭ އާމްދަނީ 2 ގުނަ ކުރުންކަން މިފްކޯގެ ސީއީއޯ އިސްމާއިލް ފައުޒީ ފާހަގަކުރެއްވިއެވެ.